Буряад ороной ниислэл Улаан-Үдэ хотодо 2015 оной октябрь һарада “Орда” гэжэ буряад-монгол уран урлалай түрүүшын галерей үүдэеэ сэлиһэн байна. Энэ эмхиин арт-директор, урлал шудалагша Надежда Абзаева маанадта галерей тухай хөөрэжэ үгөө.
Үхибүүд дуратайгаар мастер-классуудта хабаададаг.
- Энэ галерей нээхэдээ, ямар зорилгонуудые урдаа табяабта?
- Буряад-монгол уран урлал хүгжөөхэ, мүнөө үеын уран зураашадай дүй дүршэл дээшэлүүлхэ зорилготойгоор нээгдээ һэн. Этно-галерейдэ ород, хари гүрэнэй уран зураашадай үзэсхэлэнгүүд табигдадаг, һара бүри һэлгэгдэдэг. Хажуугаарнь элдэб янзын түһөө түсэбүүд эмхидхэгдэдэг: театрай зүжэгүүд, буряад дизайнернуудай хубсаһанай харалганууд, мастер-классууд, лекцинүүд ба зохёохы үдэшэнүүд г.м.
- Хэды хүн хүдэлдэгбта?
- Улаан-Үдэ хото ерэһэн айлшадай ба ажаһуугшадай һонирхол татама газарта долоон лэ хүн эбтэй эетэй хүдэлдэгбди. Бидэ уран урлалай элдэб янзын талануудые холбожо, туршалгануудые хэдэгбди: хүгжэм, театр, уран зохёол, зуралгын урлал. Байд гээд кинонуудые харуулдагбди, лекци, мастер-классуудые эмхидхэдэгбди.
- Мүнөө ямар үзэсхэлэнгүүд дэлгээтэй байнаб?
- Хоёр үзэсхэлэн табяатай байна, нэгэниинь – буряад уран зураашадай, нүгөөдэнь - Москвагай мүнөө үеын уран зураашадай бүтээлнүүд. Бүхэли март һарада соо хоёрдохи үзэсхэлэнэй хэмжээндэ би XX зуун жэлэй уран урлалда зорюулагдаһан лекцинүүдые уншажа байнаб.
- Ямар эмхи зургаануудтай холбоо баридагбта?
- Буряад ороной олон эмхи зургаануудтай холбоо баридагбди. Нэрлэбэл, Буряад республикын, Монгол ороной Уран зураашадай холбоонууд, Үндэһэтэнэй номой сан, «Байгал» сэтгүүл, Буряадай гүрэнэй филармони г.м. Эндэ һая Буряад ороной мэдээжэ уран зурааша Жамсо Раднаев мастер-класс харуулаа. Аятай зохид газарта мастертай сэхэ хөөрэлдэжэ байгаад, шэдитэ зурагуудые зуража, хүнгэн эдеэ барижа, уран урлалай ба һайхан юумэнэй юртэмсэ руу шунажа ороходо, юунтэйшье сасуулхаар бэшэ. Ерэһэн лэ хүнүүд булта сэдьхэл дүүрэн ошодог.
Дэлгэрэнгыгээр 12-дохи дугаарта.
