Тус концерт Агаһаа уг гарбалтай Монгол ороной буряад дуушад бэлдэһэн байна. Эдэ дуушадые хуасай угай Сэ Пурэвдорж дахуулжа ерээ. Багтар хуасай омогой Бат-Эрдэниин Эрдэнэбаатар, һуури бодонгууд омогой Гомбожабай Цэрэнжав, сагаан малгай хуасай омогой Баттүмэрэй Ариунбат, оргодой бодонгууд омогой Түмэрэй Наранцэцэг, лэглүүд хүбдүүд омогой Батхуягай Номин-Эрдэнэ гэгшэд аялга һайхан хонгёо хоолойгоор буряад арадай дуунуудые дуулажа, Ага тосхоной ажаһуугшадые баясуулаа. Танхимаар дүүрэн сугларһан харагшад тэдэниие халуун альга ташалгаар угтан дэмжээ юм. Дуушадые харахада, хойто нютагаа айлшалһандаа ехэ баяртай байгаа.
Мүн тэдэ Агын дасан хүрөө, Дулдаргын, Могойтын аймагуудай зондо концерт-наадаяа бэлэглээ.
Оюна ШАГЖАЕВА.
