Мүнөө жэл буряад угсаатанай урдаа хараха театрнуудай нэгэн, урдын түүхэтэй Х.Намсараевай нэрэмжэтэ Буряадай гүрэнэй академическэ драмын театрай байгуулагдаһаар 85 жэлэй ойн баяр тэмдэглэгдэхээр хараалагдана. Энэ ушараар Ага нютагта зүжэг наада табижа ябаһан Буряадай театрай режиссёр-найруулагша, Россиин Федерациин соёлой габьяата хүдэлмэрилэгшэ, Буряад арадай артист Саян Жамбаловтай уулзажа, ажал хэрэгээрнь һонирхоһон байнабди.
С.Жамбалов.
- Саян Цыдыпович, Та яагаад зүжэг найруулагшын ажалда ороһон байнабта?
- Буряадай драмын театрта бусаһаарнай, 4 жэл болобо. 2000-гаад онуудта ондоо ажалтай байгаабди. Эржена нүхэрни Буряадай филармониин директорээр 10 жэлэй туршада ажаллаад, мүнөө драмын театрай уран һайханай хүтэлбэрилэгшѳѳр томилогдонхой юм. Би зүжэг найруулан табигшаар ажалладагби. Манай нютагта режиссёрой мэргэжэл шэлэһэн хүнүүд хомор байдаг. Юундэб гэхэдэ, найруулагшын дүршэл, талаан бэлиг хэрэгтэй болодог. Бидэ 1997 ондо үндэһэтэнэйнгѳѳ түүхэ, уг узуураар һонирхожо, «Улейские девушки» гэһэн зүжэг найруулан табижа, тайзан дээрэ 17-дохи жэлээ харуулжа байнабди. Буряад нютагуудаар ябажа, урданай дуу, түүхэ шэнжэлээ һэмди. Анха түрүүн театрта ажалда ороод байхадаа, 1989 ондо Антон Чеховэй рассказуудаар нэгэ зүжэгэй найруулга хээ һэнби. Содном Хажитов намда туһалаа һэн. Би досоогоо «найруулхаб, найруулхаб!» гэhэн эрмэлзэлтэй ходо ябааб. Минии багша, профессор В.Петров «Саян, ши нэгэтэ найруулагша болохош, би найданаб» гэжэ хэлэдэг һэн. Би Ленинградай гүрэнэй театрай, хүгжэмэй ба кинематографиин институт 1988 ондо дүүргэһэнби.
- Энэ удаа Ага нютаг хэды зон ерээбта?
- Дүн хамта 37 хүн ябанабди. Тэдэнэй 9-иинь Ага нютагһаа гарбалтай залуу артистнар. Июлиин 3-һаа 6 болотор Буряадай драмын театрай байгуулагдаһаар 85 жэлэй ойн баяр угтахаяа байнабди. Ага нютагһаа урган гараһан артистнар, бүжэгшэд, уран бэлигтэн, найруулагшад, зүжэг нааданда дуратайшуул олон ха юм. Тиимэһээ бидэ урда зүг руу хараад, түрэл нютагтаа түшэглэжэ, зүжэг наадаяа Ага нютагта харуулжа байдагбди...
Согто-Хангил нютагһаа гарбалтай Зоригто Цыбендоржиев 6-дахи жэлээ Буряадай драмын театрта хүдэлжэ, дүршэлтэй боложо ябаһан актёр юм.
З.Цыбендоржиев Агын тайзан дээрэ.
Ага нютагайхид бэлигтэй хүбүүд басагадаараа омогорходог гээшэ. Тэдэнэр искусствын гуламтада үдэр бүри талаан бэлигээ мүлижэ, нэрэдээ хүрэмэ зоригтой, урагшаа һанаатай, бэрхэ артистнар болонхой. Залуу артист Зоригто Цыбендоржиев «Аба эжын ургынууд», «Ромео и Джульетта» ба бэшэшье зүжэгүүдтэ гол рольнуудые гүйсэдхэжэ, галаконцертнүүдтэ хабаадажа, ялас гэмэ абьяас бэлигээ харуулаа. Согто-Хангил нютаг зүжэг наадаяа асаржа, түрэл гаралаа, нютагайхидаа баясуулаа бэлэй. Тэрээнтэй суг хамта Түнхэн, Хурамхаан, Хэжэнгэ, Зэдэ, Ярууна нютагуудһаа гарбалтай 7 залуу артистнар түрэл нютагынь ерэлсэжэ, зүжэг наада бэлэглээ бшуу. Тэдэнэй дунда Һүдэнтэ нютагай боохой хуасай омогой Ёндоной Ламажабай Бэлигтын ехэ хүбүүн Солбон Ёндонов ябалсаа. Тэрэ гол рольнуудые шадамар бэрхээр гүйсэдхэдэг юм. Наһанайнь нүхэр Сойжин Жамбалова театрай режиссёр-найруулагшаар ажалладаг, Сэлмэг басага үндылгэнэ...
Дэлгэрэнгыгээр 19-дэхи дугаарта.
