Суг хүдэлдэг ажалтадтаяа тойрог дотор болоһон хэмжээ ябуулганууд тухай мэдээнүүдые зондо мэдүүлхэ, дамжуулха гэжэ Аягма Цыбеновнагай оролдодогые мэдэнэбди. Тэрэ ажалайнгаа хажуугаар сурбалжалагшадай мүрысөөнүүдтэ эдэбхитэй хабаадажа, үндэр шагналнуудта хүртэдэг. Жэшээлбэл, буряадай «Алтаргана» нааданай баримтата ба уран һайханай киногой мүрысөөндэ 2016 онһоо эхилээд хабаадана. Хабаадаха бүхэндөө шангай һууринуудые эзэлдэг. Мүнөө жэл «Аглаг дайдын шэмэг – агта хүлэг морид» гэһэн баримтата киногоороо 3-дахи һуури эзэлһэн байна. Аягма Доржиевагай баримтата киногой удхада буряадуудай үндэһэн ажал, хэрэг, зан заршам, ёһо заншал үзэгдэнэ. Аягма Доржиева наһан соогоо ажал хэжэ ябаһан ажалша малша бүхэриг зонтой уулзажа хүдэлдэг гэхээр.
2003 ондо тэрэ залуухан гүлмэр басаган ябаха үедөө телерадиокомпанида ажалда ороһон байна. Тэрэ сагаа дурсан, иигэжэ хэлэнэ: «Минии ажалда ороходо, Гарма Анандаевич Цырендашиев Агын гүрэнэй телерадиокомпаниин түрүүлэгшын орлогшоор хүдэлжэ байгаа. Ажалдаа дүй дүршэлтэй болоһон түрүүлэгшэ залуу маанадта һургаал үгэ, заабаринуудые хэлэдэг һэн. Нэгэ хэлэһэн үгэнь намда бүришье хадуугдаа бэлэй: «Өөрыгөө хүгжөөхэ талада һургаал абамаар зонтой нүхэсэхэ хэрэгтэй. Ажалша малша зоной хэлэһэн үгэнүүдыньшье сэнтэй байха. Тэрэнииень шүүжэ, наһан соогоо хэрэглэжэ ябаа һаа, зондоо хүндэтэй, бэрхэ хүн болохош». Эдэ үгэнүүдынь наһан соомни залуур болодог. Тиимэһээ ажалһаа сухаридаггүй хүнүүд намда жэшээ болодог. Иимэ зоноор омогорхожо, олондо, залуушуулда харуулха, дуулгаха – минии уялга».
2016 он. Улаан-Үдэ.
Тэрэ үедэ «Алтан саг» гэһэн сурбалжалагшадай толилолгонуудай мүрысөөндэ баримтата ба уран һайханай фильмүүд оролсодог байһан юм. Мүрысөөндэ буряад хэлэн дээрэ толилолго ба эфиртэ гарадаг дамжуулга гэхэ мэтэ, дүн хамта 260-аад ажал хабаадаһан байна. Эндэ Аягма Цыбеновна «Морин эрдэни» дамжуулгаараа 2-дохи һуури эзэлһэн байгаа.
