Ушарынь гэхэдэ, гүрэнэй академическэ габьяата дуу ба хатарай «Донбасс» ансамблиин үзэмжэ һайхан концерт-наадан табигдаа. Ансамблиин гэшүүд Алас Дурнын ба Сибириин хотонуудаар концерт-наада табина, энэ болбол РФ-гэй Соёлой яаманай табиһан түсэбөөр бэелүүлэгдэнэ.
   Үбэр Байгалай хизаарай дэбисхэртэ «Донбасс» ансамбль түрүүшынхеэ наада харуулаа. Холын газарһаа концерт харуулхаяа ерэһэн артистнарые Агын ажаһуугшад халуун альга ташалгаар угтан абаа. «Манай нютагта эбтэй эетэйгээр 100 гаран элдэб яһатанай түлөөлэгшэд ажаһуудаг. Тэдэнэй заншалта үндэһэн соёл Донецкын газар баяжуулна», - гээд концерт-наада хүтэлэгшэ хэлээ һэн. Энэ үгэнүүдые гэршэлэн, элдэб яһатанай үндэһэн хатар харуулагдаа. Хатар бүхэнэй найруулгань онсохон, хатаршад дүй дүршэл ехэтэй. Харагшад ехэтэ урмашан, нэрьемэ альга ташалга доро «Браво» гэжэ байгаа һэн.
   «Донбасс» ансамблиин дуушад арадтаа мэдээжэ болоһон ород арадай «Выйду на улицу», «Живёт моя отрада», хүгжэмынь А.Аверкинэй, үгэнь В.Боковой «На побывку едет молодой моряк» гэхэ мэтэ дуунуудые зэдэлүүлээ.
   Ансамблиин түүхэ хараха болоо һаа, үни сагһаа эхиеэ һабагшална. 1937 ондо Сталино хотодо (мүнөө Донецк хото) хүгжэм зохёогшо Зиновий Дунаевский «Шахтёрский ансамбль песни танца» гэһэн бүлгэм байгуулһан. Эсэгын дайн соогуур ансамблиин гэшүүд сэрэгшэдтээ концерт-наада харуулжа ябаһан. Тиигэжэ ансамбль «За оборону Кавказа», «За доблестный труд в период Великой Отечественной войны 1941-1945 гг.» медальнуудаар шагнагдаһан байна. 1966 ондо хаа-хаана үндэһэн соёлоо хүгжөөһэнэй түлөө «Донбасс» ансамбль «Габьяата» гэһэн нэрэ хүндэдэ хүртэһэн. 1968 ондо I шатын «Шахтёрская слава» гэһэн хүндэтэ тэмдэгээр урмашуулагдаһан. 2006 ондо ансамбльда «Академический» гэһэн нэрэ зэргэ олгогдоһон.

You have no rights to post comments