Мүрысөөндэ 5 драматическа бүлгэм болон 9 арадай театр хабаадаһан байна.
   Жюриин гэшүүн, режиссёр, Россиин соёлой габьяата хүдэлмэрилэгшэ, соёлой талаар РФ-гэй шангай лауреат, Зүүн Сибириин гүрэнэй соёлой институдай режиссурын ба эстрадын, театральна табилгануудай кафедрын доцент Дулмажаб Жамсоева һанамжануудтаяа хубаалдаба: «Агын Буряадай тойрогой дэбисхэртэ театральна жанрай хүгжэжэ, бэлигтэй шэнэ зоной, шэнэ зүйл нэбтэрүүлһэн түсэлнүүдэй, һонин бодолнуудай олошоржо байһанда омогорхоноб. Эдэ үдэрнүүдтэ нааданай һүүлээр коллектив бүхэнэй хүтэлбэрилэгшэдтэй, режиссёрнуудтай саашадаа яагаад юу хэхэ, амжалтанууд ба хүсэлнүүд тухайнь хөөрэлдэжэ, зүбшэл заабаринуудаа хэлэжэ, бага аналитика үнгэргөөбди».
   Агын Буряадай тойрогой мэ-дээжэ театральна ажаябуулагшадай нэрэтэ болон нэмэлтэ тусхай шангуудта хүртэһэн лауреадуудые тоолобол, драматическа бүлгэмүүдэй дунда:
   СССР-эй Уран зохёолшодой холбооной гэшүүн Батор Цырендашиевай «Лучшая режиссура» шан Сагаан-Шулуутайн «Бэлиг» болон «Лучшая постановка» шангынь Балжана нютагай «Балаган» драматическа бүлгэмүүдтэ барюулагдаа. РФ-гэй габьяата артист, Буряад Уласай арадай артист Цыден-Доржи Цырендоржиевай «Лучшая мужская роль» шан Ага-Хангилай «Галхан» бүлгэмэй Баяр-Цынгэ Нимаевта хүртөө. Зүдхэлиин арадай театрай режиссёр Аюша Бортоевой «Лучшая женская роль» шан Алханын Баирма Балдоржиевада барюулагдаа. РФ-гэй соёлой габьяата хүдэлмэрилэгшэ, «Театральная весна» харалга эмхидхэгшэдэй нэгэн Балдан-Доржи Николаевай «Лучшая женская роль второго плана» шанда Хойто-Агын Валентина Ральдина, «Лучшая мужская роль второго плана» шандань Сагаан-Шулуутайн Юрий Филиппов гэгшэд хүртэһэн байна. Агын Буряадай автономито тойрогой соёлой габьяата хүдэлмэрилэгшэ, соёлой ветеран Дарима Цыбикжаповагай тусхай шан Алханын Баяр Батоевто барюулагдаа. Шулуутайн арадай театрай артист Галина Базаровагай «Лучшая женская роль в образе матери» шангаар (хүдөө һуурингуудай дунда) Ага-Хангилай Цымжидма Лхамаева шагнагдаа юм.

You have no rights to post comments