Тус мүрысөөндэ Үбэр Байгалай хизаарай тойрогуудһаа, Шэтэ хотоһоо, Монгол оронһоо 28 бүлгэмэй – дүн хамта 749 хабаадагшад хатарха шадабарияа, үзэмжэ һайханаа харуулхаяа суглараа. Үбэр Байгалай хизаа-рай буряад соёл хүгжөөлгын түб мүрысөө эмхидхэгшэд болоно.
   Хатарай үзэмжэ һайханиие сэгнэхэ шүүгшэдые тоолобол: Үбэр Байгалай хизаарай буряад соёл хүгжөөлгын түбэй захирал Сэсэг Норполова – түрүүлэгшэ, Россиин Федерациин соёлой габьяата хүдэлмэрилэгшэ Бальжима Базаргуруева, Үбэр Байгалай хизаарай габьяата артист, «Амар сайн» дуу хатарай театрай баледэй артист Жаргалма Дамдинова, Үбэр Байгалай хизаарай соёлой габьяата хүдэлмэрилэгшэ, Үбэр Байгалай хизаарай соёлой училищиин хатарай таһагай багша Цыцыгма Дашинимаева, Үбэр Байгалай габьяата артист, «Забайкальские казаки» дуу хатарай ансамблиин баледэй артист Ольга Никитина, «Корпорация танца «Хатарыш» студиин хореограф Сэсэгма Доржиева, Үбэр Байгалай буряад соёл хүгжөөлгын түбэй методист Элбэг Самбуев, Үбэр Байгалай хизаарай буряад соёл хүгжөөлгын түбэй захиралай орлогшо Баирма Соктоева гэгшэд байгаа.
   «Олоороо гүйсэдхэһэн буряад хатар», «олоороо гүйсэдхэһэн арадай хатар», «мүнөө үеын хатар», «үсөөнөөр гүйсэдхэһэн хатар», «гансаараа гүйсэдхэһэн хатар» гэһэн янзануудаар мү-рысөөн эмхидхэгдээ. Мүн хабаадагшадые наһа наһаарнь хубаагаа.
   Аргагүй ехэ бэлэдхэлтэй хатарнуудые хүүгэд хатаржа, бүгэдэндэ һайшаагдаа.
   Үдэрэй туршада үнгэргэгдэһэн мүрысөөнэй дүнгүүд гала-концерт дээрэ согсологдоо. К.Базарсадаевай нэрэмжэтэ Агын хүүгэдэй уран урлалай һургуулиин «Баяр» ансамблиин хореограф Дарима Аюшиевагай ажал үндэрөөр сэгнэгдээ. Тэрэнэй бэлдэһэн 8 хатар түрүүшын гурбан һууринуудые эзэлээ, үшөө 2-ынь гран-при шанда хүртөө. Тиигэжэ тэрэ «Лучший хореограф» ба «Лучшая постановка» гэһэн янзануудаар шагнагдаад, Агын Буряадай тойрогой Захиргаанай тусхай шанда хүртөө. Мүн Базаржаб ба Цырендулма Батомункинтанай тусхай бэлэг Дарима Аюшиевада ба Екатерина Абидуевада үгтөө. Хореографиин ветеран Владимир Дараевич Жамсарановай тусхай шан «Баяр» ансамбльда барюулагдаа. Тус ансамбльда хэдэн хореографууд ажал ябуулдаг. Тэдэнэй нэгэн Екатерина Абидуева болоно. Энэл һургуулида хабаатай Согто-Хангилай филиалай «Мандала» ансамбль хүтэлбэрилдэг Хандама Платоновагай 3 хатар һууринуудта хүртөө.

You have no rights to post comments