Агын Буряадай тойрогой Захиргаанай урилгаар манай нютагта бууhан «Байгал» дуу хатарай театрай артистнар Агын тойрогой 80 жэлэй гала-концертдэ хабаадаа. Октябриин 1-2-ой үдэрнүүдтэ Забайкалиин хизаарай үндэhэн тамирай байшан соо хамаг олон түхеэрэлтэнүүдээ тодхожо, гурбан ехэ концерт-наада табихадаа, Москва хотодо «Танцуют все» гэhэн бүхэроссиин мүрысөөндэ гүйсэдхэhэн бүхы хатарнуудаа харуулжа, нютагайхидыемнай маша ехээр баясуулhан байна.
Буряадай гүрэнэй «Байгал» театрайхидай 2017 оной май hарада Россиин телевидениин «Танцуют все» түhөөдэ оронойнгоо хатарай эрхим бүлгэм боложо, ялас гэмэ илалта туйлаhыень мартахын аргагүй. Бидэ сэнхир экран дээрэ тэдэниие хаража, шагнажа, сэдьхэлээ хүмэрюулэн, ехээр омогорхоо бэлэйбди. Буряадай хатаршад энэ харалгада хабаадахадаа, тон hайн дүнгүүдые туйлажа, жюриин гэшүүд, мэдээжэ хореографууд В.Деревянко, А.Сигалова, Е.Дружинин гэгшэдые ходо гайхуулан, олоной hайшаал магтаалда хүртөө hэн. Агынхидшье телефоной утаhаар «байгалайхидта» дуугаа үгэжэ, дэмжэлтэ ходо үзүүлжэ байгаа.
"Байгал" театрай хатаршад.
Намжаа намарай октябрь hарын эхиндэ Ага нютагай ажаhуугшад буряад угсаатанаа суурхуулhан артистнарые, хатарнуудыень бүри дүтэhөө дахин хаража баясаха, нүхэд янзаар танилсаха, ярилдаха, сугтаа дүрэ зурагуудаа абалсаха аргатай байба. «Байгал» театрай хатаршад Агын тойрогой 80 жэлээр сугларагшадые хани халуунаар амаршалжа, олон янзын хатар шадамар бэрхээр гүйсэдхөө бшуу. Тодорхойлбол, бидэ «Угайм hүлдэ» гэhэн үндэhэн буряад хатар, саашадаа эгээл орёо венскэ вальс (энээн соо хун шубуунай дүрэ түрүүшынхеэ байгаа), «Азиин амисхал» гэhэн хитад болон контемпорари, хип-хоп, «шэнэ балет» гэхэ мэтэ нюдэ hаргаама, найман ондоо шэглэлэй хатарнуудые хаража, сэдьхэлээ ханан баясаа бэлэйбди. Хип-хоп хатарта Алексей Раднаев (энэ түhөөдэ «волк» гэжэ нэршэhэн) халзан тархи дээрээ Тумэн Раднаевые түргэн эрьюлжэ, гайхалтай арга баша (трюк) харуулаа. Хатарнуудай забһарлалда театрай гол дуушан, Шэнэхээн нютагай Бутидэй Дондогцырен ирагуу hайхан дуугаа бэлэглээ. Концерт хүтэлэн ябуулагша Хэжэнгэ нютагай Жаргал Бадмаев хатар бүхэнэй удаа артистнарта хандахадань, тэдэнэр яажа хатарнуудые бэлдэhэнээ, юу үзэһэнөө, энэ телевидениин түhөө түсэб зохёохы ажалдань ямар нүлөөтэй байгааб, ямар hонин ушартай дайралдааб гэхэ мэтые дүүрэнээр хөөрэжэ үгөө.
Дэлгэрэнгыгээр 41-дэхи дугаарта.
