Ага тосхондо, Баатарнуудай аллейн дээргэдэ Агын тойрогой ба «Ага тосхон» хотын тойрогой захиргаануудай, сэрэгэй болон бусад албануудай түлөөлэгшэд, Алдар Цыденжаповай гэртэхин сугларжа, Баатарнуудта зорюулагдаһан митингдэ хабаадаа. Алдарай хүшөөдэ баглаа сэсэгүүд табигдаа юм.
Нэмэжэ хэлэхэдэ, тойрогой һургуулинуудаар Баатарнуудта зорюулагдаһан эрэлхэг зоригой хэшээлнүүд үнгэргэгдэбэ.
Һануулхада, сентябриин 24-эй үдэр Үбэр Байгалай хизаарай хоёр Баатарнууд 26 жэлэй забһартайгаар баатаршалга харуулһан байна.
ГРУ-гай спецназай младша сержант Сергей Токмаков Афганай дайнда 200 гаран байлдаанда хабааһан юм. 1984 ондо Сергейн бүлэг отолгодо ороо. Младша сержант өөр руугаа дайсадай анхарал татуулжа, нүхэдөө абарһан байна. Харин Сергей Токмаков алдалан унаа һэн. Баатар хүбүүн Дайшалхы Улаан Тугай орденоор шагнагдаа бэлэй.
26 жэл үнгэрһэнэй удаа Номгон далайн флодой матрос Алдар Цыденжапов «Быстрый» эсминец дээрэ һүжэрһэн ехэ түймэр унтаргаажа, амин наһанайнгаа ашаар сэрэгэй онгосо болон экипаж абарһан байна. Россиин Федерациин Геройн нэрэ зэргэдэ хүртөө һэн. Мүнөө үедэ «Алдар Цыденжапов» гэжэ нэрэтэй корвет Владивосток хотоһоо һүүлшын шалгалтын һүүлээр далай гараһан байна. Нютагаймнай Баатарай сэрэгэй онгосо октябрь һарын эсэстэ Номгон далайн сэрэгэй флодой бүридэлдэ орохоор хараалагдана.
