Тэндэл совет сэрэгшэдэй байрлаһан хэдэн дабхартай шулуун гэрнүүд мүнөөшье байна, зариманиинь хаясаанай, һандаржа байһан байшангууд. 1990 гаран онуудта совет сэрэгшэдэй гаража ошоһонһоо хойшо орхисооной. Тэндэл музейнүүд бии: аймагай үндэһэтэнэй болон байгаалиин хоёр музейн шэнэ томо байшан баригдажа байна. Дайнай үедэ Г.Жуковай байрлаһан гэрынь олоной ябадаг музей болонхой. Тэндэл Халхын голой дайнда илалтын 50 жэлэй ойгоор дашарамдуулан 1989 ондо хүшөө бодхоогдоһон байна. Мүнөө энэ хүшөө тойруулан, ехэхэн газар музейнэ комплекс болохоор хорёолоотой.
   Энэ талмай дурасхаалай сэсэрлиг болохоор хараалагдана. Жэшээлбэл, клумбануудай маягаар Дорнод аймагай бүридэлдэ ородог 14 сүмын карта зохёогдожо байна. Нэгэ буландань Дорнод аймагта ажаһуудаг үндэһэ яһатанда зорюулагдаһан хүшөө зогсоно. Хүшөө дүрбэн ханатай: баруун талань халхада зорюулагдаһан, хойшоо хараһаниинь - буряадта, зүүн тээхинь - баргада, урда талань - үзэмшэндэ.
   «Дорнод аймаг бүхыдөө 83 мянган зотой, тон олониинь халха-монголшууд, харин 20 мянганиинь буряадууд болодог юм», - гээд аймагай буряадуудай бүлгэмэй түрүүлэгшэ Хүрэлбаатар дарга хэлэнэ һэн.

You have no rights to post comments