Владимир Алексеевич 1950 ондо Ага тосхондо түрэһэн. Һургуулияа дүүргэһэнэй удаа 1968 ондо бүһэтэй хүнэй нангин уялга дүүргэхэеэ сэрэгэй албанда татагдаад, 1970 оной хабар гэртээ табигдаһан юм. Эгээл тэрэ үедэ Бооржын аймагай, залуухан, сэбэрхэн, зангаараашье зохидхон Валентина Николаевна Агын багшанарай колледждо һуража ябаа. Баһал хүсэн дундаа ябаһан залуу, сэмсэгэр сэхэ бэетэй Владимир хүбүүн Валентинатай танилсажа, хараһаар лэ, дуранай охиндо эзэлэгдэһэн ха. Тиигэжэ удангүй хоёр залуушуул инаг дураяа баталжа, гэр бүлэ болохо гэжэ шиидэһэн байна.
Һая сэрэгэй албанһаа ерэһэн, бүлэтэй болоһон хүбүүн Агын 2-дохи дунда һургуулида эдиршүүлые авто-унаа жолоодожо һургадаг инструктораар ажалайнгаа намтар эхилһэн юм. Удаань АТП-дэ, Агын тойрогой гүйсэдхэхы хороондо жолоошоноор, Агын окрисполкомой ОВД-гэй гүрэнэй автоинспекцидэ харгын-патрульна албанай инспектор, взводой командир, мүрдэгшын уялга дүүргэгшэ г.м. тушаалнуудта амжалтатай хүдэлһэн. Тэндэһээ болижо, «Туяа» хүүгэдэй сэсэрлигтэ, хажуугаарнь ород дуунай «Рябинушка» ансамбльда аккомпаниатораар ажаллаа. Мүнөөшье Владимир Алексеевич миин байжа шададаггүй, К.И.Базарсадаевай нэрэмжэтэ Агын хүүгэдэй уран урлалай һургуулида концертмейстерээр хүдэлнэ. Харин наһанайнь нүхэр Валентина Николаевна райкомкомсомолдо, СПТУ-да хүмүүжүүлгын ажалай талаар директорэй орлогшоор хүдэлһэн байна. Һүүлээрнь Агын 2-дохи дунда һургуулида валеологоор хүдэлжэ байһанаа, наһанай амаралтада гараһан юм.
«Абамни буряад, Согто-Хангилһаа гарбалтай Цыбик Батуев, эжымни ород. Теэд абын шуһаар дамжан ерэһэн буряад хэлэеэ тон һайнаар мэдэхэгүйб, зүгөөр буряад бэреэдтэй боложо, түрэл хэлэеэ мэдэдэг байһаарынь тон ехээр омогорходогби», - гэжэ Владимир Алексеевич мэдүүлнэ һэн.
Бэе бэедээ урин зөөлэн хандасатай, эбтэй эетэй бүлэ гурбан һайхан үринэрые үндылгөө. 1971 ондо алтан дэлхэй дээрэ басагатай боложо, залуу бүлэ ехээр баярлаһан юм. Басаганиинь Советскэ Союзай һандархын урда тээ Прибалтика ошоод, тэндээ үлэһэн. Литвагай Клайпеда хотодо гэр бүлэтэеэ ажаһуудаг. Үниндөө жэл гү, али 2-3 жэл болоод, аба эжыгээ, нютагаа эрьежэ ерэдэг һэн. Мүнөөшье зун Агаяа ерэхэ түсэблэһэниинь, коронавирус үбшэн дэлгэршоо. Басаганай удаа хоёр хүбүүд түрөө. Тэдэнь Шэтэдэ контрактна аргаар алба хаана. Тиимэһээ хоёр хушуун үринэрые түрэжэ, эхэ эсэгын жаргал эдлэһэн Батуевтан хүүгэдэйнгээ, долоон аша зээнэрэйнгээ, гушынгаа айлшаар ерэжэ, гэр дүүрэн шууялдахадань, үнэн зүрхэнһөө хүхилдэдэг, амтатай шэрээ бэлдэжэ, һонинииень шагнажа, эрхэхэн бэрхэхэн багашуулайнгаа амтатайхан түнтүүень таалажа, сэдьхэлээ тэниидэг юм. «Аша гушанарайнгаа томонууд болохыень хаража, үри хүүгэдтээ хамһалсажа байһандаа угаа баяртай байдагбди», - гэжэ мүнөө наһатай болоһон хүгшэн аба эжы хоёр хөөрэнэ.
