Энэ удаа артистнар 3 янзын зүжэг болон гала-концерт харуулаа. Хүүгэдтэ зорюулагдаһан «История одного блогера» интерактивно-зүжэглэмэл наадан, Франциин драматург Лоран Баффиин «Бонобо» пьесээр табигдаһан «Басаган, этигээрэй» зүжэг табигдаа. Энэ зүжэгтэ Буряад арадай артистнар – Б.Ёндонов, Б.Динганорбоев, Б.Дамбаев, Буряад Республикын габьяата артистнар – Г.Галсанова, Н.Мунконова, Ж.Динганорбоева ба Д.Лубсанова гэгшэд хабаадаа. Тиихэдэ «Оройтоһон дуранай охин» мелодрамада харагшад дуратай артистнартаяа – Россиин арадай артистнар М.Елбоновтой, Л.Егороватай болон М.Зориктуеватай, Россиин габьяата артист Д.Сангажаповатай болон олон бусадтай уулзажа, дахяад талаан бэлигтэй, шадабаритай нааданһаань сэдьхэлээ ханаа юм. Танхимаар дүүрэн харагшад, шанга альга ташалга, баглаа сэсэгүүд – тойрогоймнай ажаһуугшадай Буряад драмын театрта дуратай, ажалыень сэгнэдэг байһые дахяад гэршэлнэ. Энэ бүлгэмэй бүридэлдэ Агын тойрогһоо гарбалтай олон артистнар хабаадаа.
   Апрелиин 18-да Догой нютагта Россиин Федерациин габьяата артист, Агын Буряадай автономито тойрогой соёлой габьяата хүдэлмэрилэгшэ Цыден Цырендоржиевай 70 жэлэй ойн дурасхаалда зорюулагдаһан концерт харуулагдаа. Ага тосхонһоо гадуур артистнар Могойтодо, Дулдаргада болон Согто-Хангилда талаан шадабарияа харуулаа юм. 

You have no rights to post comments