Аргали нютагта Базаржаб ба Светлана Галсановтанай бүлэдэ 1980 оной январиин янгинама хүйтэндэ Галя басаган шанга хашхараагаар алтан дэлхэйдэ мүндэлһэнөө мэдүүлээ. Гэр бүлэдөө түрүүшын үхибүүн үшөө хоёр дүү басагадые дахуулаа. Элдин тоонто нютагтаа дунда һургуулида орожо, олон багшанарай һургаал заабари абажа, 1997 ондо дүүргэһэн. Галя һургуулидаа уран һайханай харалгада амжалтатай хабаадажа, түрүүшын дүршэлнүүдые абаа ёһотой. Буряад драматическа театрай директор Майдари Жапхандаев Агын тойрог ерээд, Зүүн Сибириин гүрэнэй соёлой болон урлалай академидэ залуу халаан абаха тухай соносхоһон юм. Аргалиин соёлой байшанай хүдэлмэрилэгшэд – Любовь Людофа ба Галина Ринчинова хоёр Галиие бэлдэһэн байна. Прозо, шүлэг уранаар уншаха, хатар гүйсэдхэхэ, зоной урда яажа бэеэ абахаһаа эхилээд, олон юумэ заажа үгөө. Ядамаргүй түрүүшын тур гаража, Галина Улаан-Үдэ 2-дохи турта хабаадахаяа уригдаа. Тиигэжэ Буряад Уласай ниислэл хотодо үшөө 2 тур гаража, дээдэ һургуулиин оюутан болоһон юм. «Эжын намайе ород ангида оруулха гэжэ байхадань, Юмжидма Арьяновна буряад класста абаһан, түрэлхи хэлэндэм эльгэлүүлһэн, намда олон юумэ зааһан багшам болоно», - гэжэ Галина Базаржаповна хөөрэнэ. Галиин хэлэһээр, өөрөөшье мэдэнгүй артистын хуби заяа шэлэжэ, тэрэнь һүүлдэ бүхы наһанайнь ажал, дуратай хэрэгынь – аза талааниинь болоо ха юм.
Аба эжын буянгаар...
«Хүгшэн эжым һаалишанаар Дабаатада хүдэлһэн, хүмүүжэлдэм олиггүй ехэ нүлөө үзүүлһэн, Бурхан бии, һүзэг гээшые ойлгуулһан. Майн 9-эй һайндэрэй урда тээ Агын телевидени ба радиогой хүдэлмэрилэгшэдэй ерээд буулгахада, хүгшэн эжы ара талын ажал тухай хөөрөө, гоё гэгшээр дуунуудые дуулаа бэлэй, ямар гоё хоолойтой һэм! Улаан-Үдэдэ һурахаяа ошоходом, аша басагамни артист болохонь гэжэ ямараар хүхеэ гээшэ һэм! Хэлэһэн, хөөрэһыень ходо һанажа ябадагби. Һургуулияа дүүргэтэрни, амиды мэндэ ябаа һаань, ямар гоё байха һэм! Галсан Бальжиров хүгшэн абамни – Эсэгын дайнай ветеран, Баруун болон Зүүн дайнда хабаадаһан, Берлин хүрэтэр ошоһон сэрэгшэ юм. Хүгшэн абамни минии мүндэлхые хүлеэгээ, үрдеэгүй даа, нэгэ һара урид шархануудһаа наһа бараһан. Наһатай эжым олон юумэ – хүгшэн аба тухай, элдэб домогуудые, түүхэ намда хөөрэдэг һэн, тэрэнэй тоодо Аргали тухайгаашье. Энэ һонин хөөрөөень шагнажа, бэедээ шэнгээжэ, ухаандаа бодомжолжо һурааб гэжэ дээдэ һургуулида ороходоо ойлгооб. Саашадаа энэмни дүрэ наадахадам, һанал бодолыем хүдэлгэжэ, ехэ туһа боложо үгэдэг һэн», - гэжэ Галина Базаржаповна тэмдэглэнэ.
Жэл бүхэн амаралтада гарахадаа, Галина басагантаяа, дүүнэрынь бүлэтэеэ тоонто нютагаа, гэртэхиндээ яаража ерэдэг байна. «Зунай гоё хаһада аба эжыдээ сугларжа, хони гаргажа хүндэлүүлхэ, хүүгэднай танилсаха, түрэлхидтөө айлшалха, ехэ хүхюу зугаатай байдаг. Хүүгэднайшье нагасындаа ерэхэ дуратай юм. Гэртэхинэйнгээ гэр ажаллаха, үбһэ хулһанда бэлдэхэ г.м. хүл хөөрсэг болодог лэ даа. Абамни наһанай амаралтада, тиибэшье үхэр мал бариһаар зандаа. Бүхэли наһаараа жолоошоноор хүдэлһэн, мотоор задалха, суглуулжархиха дүршэлтэй. Авто-унаагай талаар асуудалай гарахада, абадаа хонходожо, заабаринуудые абажа байдагби. Эжымнай Оловяннын аймагай Улаан-Сэсэг нютагай түрүү хонишон Содном ба Нина Доржиевтанай бүлэдэ түрэһэн юм. Нютаг соо түрэ наранай болоходо, меню табидаг, амтатайгаар эдеэ буйлуулдаг. Эжымнай зондо туһалхал гэжэ байдаг, байһанаа хубаалдадаг хүн юм. Бидэ, хүүгэдынь, аба эжын буянгаар һайнаар түбхинэжэ, булта ажалай жолоо шанга баринхайбди», - гэжэ Галина хөөрэнэ.
Ветеранууднай – минии залуур
Академидэ 5 жэл һурахадаа, куратор Эмма Баторова, Саян ба Эржена Жамбаловтан, Дарима Халматова, Нелли Дугаржабон багшанарайнгаа талаан бэлиг бэедээ шэнгээгээ, артистын уян бэеын хүдэлсэ, дуулаха, хатарха, наадаха шадабари шудалһан байна. Дүүргэхэдээ, дипломно ажалдаа «Васса Железнова» зүжэгтэ гол дүрэ – Васса Железновае наадажа, үндэр сэгнэлтэдэ хүртэһэн юм.
«Театраймнай ветеранууд – Михаил Елбонов, Лариса Егорова, Марта Зориктуева, Дарима Сангажапова, Людмила Дугарова – дээдэ гарай мэргэ-жэлтэд. Концертдэ хэһэгүүдые наадахадань, гүйлдэжэ ерээд, хүшэгын саанаһаа харадагбди. Ямар гоёор наададаг бэ?! Ямар интонаци, ямар арга хэрэглэжэ, дүрэ гүнзэгыгөөр нааданаб гэжэ харадаг, хүн бүхэнэйнь заабари, онсо илгаатай наадыень анхардаг, дүй дүршэлдэнь һурахые оролдодог, талаан шадабарииень бэедээ шэнгээдэгбди. Иимэл талаан бэлигтэйшүүл минии залуур болоһон, тэдээнтэй хүдэлхэ аза талаантай байһан-даа жаргалтайб», - гэжэ Галина аха нүхэд тухайгаа дулааханаар дурсана.
Галина Базаржаповна «Басаган, этигээрэй!» зүжэгтэ ямаршье бэрхэшээлнүүдһээ айхагүй, омог дорюун Лойжидые шадамар бэрхээр наадаа. Залуу артист ажабайдалдаашье сэхэ зантай, мүхөөгөө үхэшьегүй гэжэ һанахаар. Залуу артистын хөөрэһөөр, 1990-ээд онуудта түрэһэн хүүгэд шэрхи боро ха юм. «Тэрэ үедэ аба эжымнай элдэб бэрхэшээлнүүдые үзэһэн, урагшаа һанаатайгаар ябахада, бүхы юумэн дабагдадаг. Суг һураһан нүхэдни булта хүдөөгэй, бүлын ехэ ажал хэжэ үндыһэн. Мүнөөшье болотор гэртэхиндээ хамһалсажа байдаг», - гэжэ Галина тэмдэглэнэ.
Залуу артист сүлөөтэй сагтаа фитнес-клуб ябажа, бэеэ һоридог. Авто-машинаяа өөрөө заһажа һурахаяа һанадаг. Амтатай эдеэ шанажа, хүүгэдээ, айлшадые хүндэлхэ дуратай юм. Байгал далай ошожо амардаг. Хари гүрэнүүдээр аяншалха дуран байбашье, аба эжым мүнхэ бэшэ, тэдээнтэеэл уулзахам шухала гэжэ тоолодог. «Тайзан дээрэһээ геройнуудай сэдьхэлээ хүдэлэлгэ, һанал бодол болон мэдэрэл харагшадта хүргэжэ үгэхэ мэргэжэлтэй байһандаа сэдьхэлни ханадаг. Үшөө Ага нютагаа ерэһэндээ туйлай ехэ баяртайб. Бүлгэмэйхиднайшье манай тойрог ерэхэ дуратай, агынхид хүндэмүүшэ, халуунаар угтадаг юм», - гэжэ Галина басаган хэлэнэ.
Хоёр хушуун үхибүүдэй эжы, омог дорюун зантай, нүхэдтөө хүндэтэй, амжалта түгэс ажаллажа ябаһан нютаг басагамнай 18-дахи жэлээ тайзан дээрэ хэдэн олон сэдьхэл хүдэлгэмэ дүрэнүүдые наадажа, маанадые, хари гүрэнүүдэйшье харагшадые хужарлуулжа ябана.
