Алтан энэ дэлхэйтэеэ хахасаһан хүн түрэлөө һэлгэбэ гэхэ, Тимур Пурбуевичнайш ондоо һайхан түрэлөө олохо. Зүгөөр энэ дэлхэй дээрэ аха нүхэрыемнай зон удаахан лэ дурсаха гэжэ маргахааршье бэшэ: олондо мэдээжэ, хүндэтэй сэтгүүлшэн арбаад хэблэлтэй тон нягта харилсаатайгаар ажалладаг һэн, тиимэһээ үргэн олон уншагшадтай байгаа бшуу. Оролдосотой, харюусалгатай, һүүлшынгээ үдэрнүүд болотор бэшэжэл байгаа, хэжэ байһан ажалынь асари ехэ, олон шэглэлэй һэн. Тамирай болон сэрэгэй темэдэ удха түгэлдэр материалнуудые бэшэхэһээ гадна Шэтын «Дамба Брайбунлинг» дасанай шэрээтын олониитэтэй харилсаанай талаар туһалагшань, Үбэр Байгалай буряадуудай ниитэ эмхиин зүблэлэй гэшүүн, «Патриоты России» намай Үбэр Байгалай таһагай түрүүлэгшын орлогшо байгаа. СССР-эй болон Россиин Журналистнуудай холбооной гэшүүн. Ород Уласай Зэбсэгтэ хүсэнүүдэй «Красная звезда», Зүүн зүгэй сэрэгэй тойрогой «Суворовский натиск», Забайкалиин сэрэгэй тойрогой «На боевом посту» газетэнүүдтэ нютаг оронойнгоо сэрэгэй һонинуудые бэшэдэг байгаа. «Чита спортивная» һониной редакционно зүблэлдэнь ородог һэн. «Ветеран Забайкалья» газетын ахамад редактор болон Үбэр Байгалай хасагуудай газетын редактор ябаа. Хизаарай хэдэн хэблэлдэ, тэрэ тоодо «Толон» һониндо уран баян хэлэтэй, жанр жанртаа тааруу материалнуудынь саг үргэлжэ толилогдодог бэлэй. Материалнуудынь саг соогоо бэшэгдэхэ, хараалагдаһан болзор соогоо, уридшье редакциин хаягаар эльгээгдээд лэ байдаг һэн. Жэшээлбэл, уридшалан эльгээгдэһэн «В чистом поле – система «Град» гэһэн статьянь «Красная звезда» газетын сайтда октябриин 21-эй үдэр табигдаа. Иигэжэ үдэрһөө үдэртэ хэһэн тэмдэглэлнүүдынь мүнөө үеын бодото байдал харуулжа, саарһан дээрэ мүнхэлэгдөө ха юм.

Тимур Пурбуевич Ламбаев 1955 оной ноябриин 12-то Ага тосхондо улаалзай хүбдүүд угай Цыден-Пурбо Ламбаевай гэр бүлэдэ түрэһэн, Аргали нютагта үндыһэн байна. 1973 ондо Агын 1-дэхи дунда һургуули дүүргээд, Зүүн Сибириин технологическа институдта ороо. 1974 ондо сэрэгэй албанда татагдаад, политработник-офицерэй болон сэрэгэй журналис-тын тушаалнуудта 36 жэл 7 һарын туршада алба хааһан намтартай. Курганай агаарай сэрэгэй дээдэ училищи болон Минскын гүрэнэй багшанарай институт дүүргэһэн.

Сэрэгэй алба Прибалтиин, Ураа-лай, Забайкалиин, Сибириин сэрэгэй тойрогуудта болон баруун-Хойто сэрэгэй бүлэгтэ хааһан юм. Запаста бай-һан подполковник, Россиин Зэбсэгтэ хүсэнүүдэй олон медальнуудаар шагнагдаһан. Мүнөө үеын сэрэгэй байдал тушаа али олон тэмдэглэлнүүдые хэблүүлхэһээ гадна Халхын гол шадархи болон солонгос дайнуудай түүхэ шэнжэлдэг, тэндэ хабаадаһан сэрэгшэд-геройнууд тухай зураглан бэшэдэг, фото-репортажнуудые толилдог байһаниинь мэдээжэ. Олон лэ Аргали нютагайхидаа энэл хүн саарһан дээрэ сараа гаргажа, түүхэдэ үлѳѳгѳѳ.
Сэрэгэй алба хаажа ябахадаа, тамираар бэеэ һоридог байһаниинь саашадаа тамирай сурбалжалагша болохо хэрэгтэнь нүлөөлөө хаш. Тимур Пурбуевич футболоор агаарай-транспортна сэрэгэй спартакиадын шанда гурбан удаа хүртэһэн, бүхэ барилдаагаар Прибалтиин сэрэгэй тойрогой мүрысѳѳнүүдтэ гурба удаа призёр болоһон байна. Тамирта һонирхолынь угтаа һулараагүй. Тамирай мүрысөөнүүдһээ репортажнуудые болон тамиршад, тамирай бүлгэмүүд тухай зураглан бэшэхын хажуугаар орон нютагайнгаа футболой, хоккейн ба шатарай түүхэ тухай бэшэдэг байгаа.
Наһанайнгаа нүхэр Виктория Дугдамовнатай хоёр хушуун үринэрые хүмүүжүүлээ, зээ басаганиинь үндыжэ байна.
Ехэл нимгэн дотортой, аргатайл һаа, хүндэ туһалха тухай бодожо ябадаг хүн һэн гэжэ Тимур Пурбуевичые мэдэхэ зон хэлэхэ. Һаруул дурасхаалынь бултанаймнай – олониитэ уншагшадай зүрхэ сэдьхэлдэ үлэхэл даа. Харин гүн удхатай олон тоото толилолгонуудайнь сагай ошохо бүри сэнтэй болохонь дамжаггүй.

You have no rights to post comments