Хүдѳѳ талын харгыгаар ГАЗ-51 автомашина Согто-Хангилай зүг руу яаран гүйлгэнэ, ушар юуб гэхэдэ, Ага тосхондо багшанарай училищида шалгалта бариха хүсэлтэй басагад, хүбүүд кузов дээрэ hууhан, хубидаа элдэб бодолдо абтанхайнууд, ехэ шанга эрмэлзэлтэйнүүд ябаа бэлэйбди даа. Удангүй Агаяа хүрэжэ, педучилищида шалгалта тушаажа, найман жэлэй hургуули дүүргэhэн тойрогой хүбүүд, басагад оюутад болоо бэлэйбди. Тэрэ үедэ училищиин захирал Тригер Матвеевич Малацагаев байгаа. Һуралсалай таhаг ба түүхын хэшээлнүүдые Бадмажаб Батуевич Батуев дааhан юм. Удангүй һая ороhон оюутадые хүдѳѳ ажахын ажалда – таряа хуряалгада сасажа эльгээбэ. Сахюурта нютагай Хотогор гэжэ участогта ехэ таряанай хүндыдэ хаа-хаанаhаа олон оюутад ажаллаа бэлэйбди даа: таряа сэбэрлээ, обоолообди – үглѳѳнhѳѳ үдэшэ болотор ажал ехэ байгша бэлэй. Тэрэ сагта колхозууд баян ургаса ургуулжа, гүрэндэ тушаадаг байгаа. Эндэ тон түрүүшынхеэ танилсаhан Агын басаган Дулма Дашидондокова, Шандалиин Цымжидма Готопова, Дарима Димчикова болон хэдэн тээhээ ерэһэн олон оюутад ажаллаа һэн.
Октябриин эхинhээ одоол багшанарай hургуули бидэндэ үргэн дэлисэтэйгээр үүдэеэ нээжэ угтаа бэлэй даа. Бидэшье багшын эрдэмэй ехэ далай руу шунган ороо бэлэйбди. Бидэниие ехэ илдам зохид багша Анастасия Андреевна Казанкова толгойлжо абаба. Тоо бодолгын хэшээл Лидия Ивановна Новикова ябуулдаг байгаа. Ород хэлэ, методико Тамара Александровна Наякшина, Екатерина Доржиевна Жалмаева, психологи, педагогико Эмма Аюровна Базарова заагаа. Виктор Николаевич Долгополов тамирай талаар ехэ эрилтэ табидаг, брус дээрэ гимнастика, кольцо, мушхамал таталга гэхэ мэтэ элдэб янзын мүрысөөнүүд училищида ходо боложо байгша бэлэй даа. Yшѳѳ Агын педучилищи столой теннисээр ехэ шанга, можо соогоо дунда һуралсалай эмхинүүдэй хоорондо оройлдог байгаа. Бидэнэй hуража байха сагта манай курсда шанга разрядтай теннисисткэнүүд: Валентина Дашинимаева, Цыремжит Гындынова, Дарима Димчикова, доодо курсын Цындыма Базарова эдэбхитэй хабаададаг байhан юм.
Дарима НАМСАРАЕВА, багшын ажалай ветеран.
