Авторай үгэ
   Ажалайнь намтар: 1950-1952 онуудта – Монгол Арадай Хубисхалта намай түбэй хорооной үйлэдбэриин (промышленностиин) таһагай дарга, 1953-1960 онуудта – Монгол гүрэнэй Хэлхеэ холбооной, Транспортын яамануудай сайд, 1960-1965 онуудта – Москвагай түмэр харгын дээдэ һургуулиин оюутан, 1965-1972 онуудта – Улаан-Баатарай түмэр замай ахалагша инженер, Бүгэдэ найрамдаха Монголой арадай (БНМАУ) Уласай транспортын хорооной дарга, Уласай сайд, Транспортын яаманай сайд, 1972-1979 онуудта – БНМАУ-гай Арадай хинан шалгаха хорооной дарга, 1979-1986 онуудта – Вьетнам, Болгари гүрэнүүдтэ Монгол Уласай элшэн сайд, 1986-1990 онуудта Монгол Арадай Хубисхалта намай түбэй хорооной болбосоруулха хүсэнэй хүдэлмэрилэгшэдые бүридхэдэг таһагай хүтэлбэрилэгшэ.
   Дамдинжав – түрэhөөрөө Юмсэнэй Лэгдэнэй дүрбэдэхи басаган Балгарай ехэ хүбүүн. Балгар эсэгынгээ үгөөр Монгол ошожо, түрхэмдөө нарайлаад, хүбүүгээ гэртэхиндээ орхижо, нютагаа бусаhан түүхэтэй. Дахин хадамда гарахадаа, түрүүшын hамгаяа гээгдүүлhэн, гурбан дахуул басагадтай Согтын Сокшигботой ниилэжэ, хэдэн хүүгэдые түрөөд, ядамаргүй шадалтай айл болоо. Шэнэ тогтоhон колхозой гэшүүн хатуу шэрүүн 1930-аад онуудта Эрхүүгэй можын хүйтэн тайга руу гэр бүлөөрөө сүлүүлжэ, үйлэ тамаяа үзэhэн.
   Шобгоhоо (Сокшигбо) түрэhэн хүүгэдынь: Будажаб Сокшигбоевич Соктоев – Эсэгын дайнай ветеран, хурандаа (полковник), олон жэлдэ сэрэгэй албатан; Жимба Балданович Балданов (гэртэхиниинь сүлүүлхэдээ, айлда үгэhэн) – Солонгос дайнай ветеран, Агын тойрогой наймаагай эмхидэ урагшатай хүдэлhэн; Цыремжит айлда үгтэhэн, залуугаар үгы; Цыренжап Сокшигбоевич Соктоев хэдэн колхозой түрүүлэгшэ, удаань Агын Буряадай тойрогой гүйсэдхэхы хорооной түрүүлэгшэ (1975-1982 онууд), СССР-эй Верховно Зүблэлэй хоёр зарлалай депутат, наhаараа тойрогой ба Шэтын можын эмхи зургаануудта хүтэлбэриин ажалда ябаhан; одхон Цыден Сокшигбоевич – инженер-механик, зүблэлтэ засагай үедэ ажахынуудай инженерээр, шэнэ засагта наhанай амаралтада гаратараа, тойрогой экологиин хорооной түрүүлэгшээр ажаллаа.
   Юмсэнэй Лэгдэн Цыденжаб хүбүүнтэеэ түрэл түтимhөө таhаржа, холын Монгол орон нүүгээд байтараа, нэгэ үдэшэ хүгшэндөө хэлэhэн гэдэг: «Хүбүүмнай ябуулга муутай, аалин эрэ, энээндэмнай туhалжа, абажа ябаха нүхэр хэрэгтэй». Табан басагадынь хадамтай, Ага нютагтаа үлэhэн. Яаха бэлэй гэлсэхэдээ, Хулинда хадамнаhан Балгар басагамни жэрмэhэн болобо гэжэ дуулаад, хадамда гараhаар, түрхэмдөө айлшалаагүйень шалтажа, «манайдаа ерэжэ хүнгэрэг» гэжэ захиhан. Хүбүүн гараа hаань, гэртээ үлөөхэ, басаган байбалнь, эхэтэйнь бусааха бодолтой байһан ха. Талаан тудахадаа, хүбүүн түрэжэ, эхэнь нютагаа бусаад, дахин хадамда Согтын Шобгодо гараhан, үнинэй ханилhаншье байжа болоо.

You have no rights to post comments