Агын хүбүүн каратэ-кёкусинкай янзаар Чечен ороной абарга Башдам Амадовые булижа буляа. Тиигэжэ ММA тулалдаагаар Бадмацырен дэлхэйн гурбадахи тамиршаниие диилэбэ гээшэ, харин өөрөө нэгэшье диилдэжэ үзөөдүй ябана. Будаланай тамиршан панкратин тулалдаагаар дэлхэйн, Европын абарга болоһон, дайшалхы самбаар, дүрэ буляалдаатай барилдаагаар тамирай мастер. Агын аймагай хүүгэдэй тамирай һургуулиин шаби. Нютагтаа һуража ябахадаа, һоригшо Буянто Дугаровай хүмүүжүүлгэ доро барилдаанда ябаһан. Эндэ һая Хүнхэрэй Зандан Цыденов иимэ мүрысөөндэ амжалта туйлаһан байна. Иигэжэ Онон голой эрьедэ үндыһэн тамиршад холын газарта тулалдаанай мүрысөөнүүдые эрхимээр дабажа ябанад. Минскдэ Бадмацыренэй хажуугаар, буряад угсаатаниие түлөөлһэн Эрхүү можын Баир Асалханов тулалдажа, Чечен ороной бэрхэ барилдаашанда шүүгдэһэн байна.

You have no rights to post comments