Тэрэ мүрысөөндэ Буряад оронһоо, Эрхүүгэй можоһоо, Үбэр Байгалай хизаарһаа - хамта 25 бүхэшүүл хабаадаха. Тэдэнэй олонхинь Агын тойрогһоо уг гарбалтай. Мүнѳѳнһѳѳ барилдаашад Россида барилдахаяа бэеэ һорино. Нэрлэбэл, Тамир Гармаев, Жаргал Дамдинов, Билигто Хайдапов, Булат Батоев, Балдан Цыжипов, Тимур Баторов, Цэдаши Дугаров, Барас Базаров, Аюр Галсанов, Базар Батоболотов гэгшэд болоно. Мүн буряад арадай урдаа хараха барилдаашад Александр Богомоев, Евгений Жербаев, Даши Шарастепанов гэгшэд хаба шадалаа туршаха.

Мэдээжэ бүхэ, Буряад ороной барилдаанай ахамад һоригшо Цыбик Максаровай хүтэлбэри доро барилдаашад Байгалай эрьедэ «Энхалук» лагерьта һорилго гараха, удаань Минскдэ Олимпиин абарга Александр Медведиин шангай мүрысөөндэ хабаадаха.

Россиин мүрысөөн энэ жэлэй хабар Улаан-Үдэ хотодо үнгэргэгдэхэ аад, коронавирусһаа боложо, хойшолуулагдаһан байна.

You have no rights to post comments