Сентябриин 5-да Алабино полигон дээрэ “Танковый биатлон” мүрысөөнэй финал үнгэрөө. Россиин танкистнуудай суглуулагдамал можо 1 саг 28 минута 53 секунда соо мүрысөөнэй зай гаталжа, түрүү һуури эзэлээ. Хоердохи һуурида Хитад гүрэнэй можо 1 саг 29 минута 30 секундын дүн харуулһан байна. Беларусиин можо 1 саг 37 минута 48 секунда соо фиништэ ерэжэ, гурбадахи болоо. Дүрбэдэхи һуури 1саг 54 минута 22 секундын дүнтэй Азербайджанай можо эзэлээ.
Россиин суглуулагдамал можын 2-дохи экипажай механик-жолоошон - Алханын хүбүүн Сандан Санжиев. Нютаг хүбүүмнай эрхим бэлэдхэл, баян дүй дүршэл харуулжа, можынгоо илалтада хубитаяа оруулаа бшуу.
