Тиигэжэ сентябриин 21 –дэ Ивалгын дасанда Этигэлэй хамба ламын найр нааданда Урда-Ага нютагһаа гарбалтай Цыбик Максаров буряад барилдаагаар 75 килограммһаа дээшэ шэгнүүртэй барилдаашадай дунда абарга бүхэ болоо бшуу. Мүн Согто-Хангил нютагай Амгалан Дармаев hур харбаагаар абарга мэргэнэй солодо хүртэбэ. Буряад һур харбаанай эсэсэй мүрысөөнэй 8 финалистнуудай 7-иинь манай Агын мэргэшүүл байгаа.
Сентябриин 20-до Янгаажин дасанай Очир Дара бурханай ордоной рамнайн нааданай hур харбаанда 100 гаран хүн хабаадажа, агынхид тус мүрысөөнэй 8 тон хёрхо мэргэн харбаашадай тоодо ороо. Ага-Хангил нютагай Дугар Гармажапов Лыгжима Сосорова хани нүхэртэеэ абарга мэргэшүүл боложо баясуулаа. Мүн Б.Людофа, Б-Ж.Жаргалов (Сүүгэлэй дасан), Б.Базардашиев (Агын дасан), Д.Цыбенов (Зугалайн дасан) гэгшэд һур харбалгаар шангай һууринуудые эзэлһэн байна.
