Мүнөө жэлэй февраль һарын эсэстэ Нью-Дэли хотодо үнгэргэгдэһэн Азиин мүрысөөндэ бүхэ барилдаагаар нютагаймнай Арсалан Будажапов Индиин барилдаашан Балян Гуравые диилэжэ, Азиин абарга болоо гэһэн баяртай мэдээсэл дуулдаа һэн. Энэ илалтаар урдаа хараха тамиршамнай Кыргыз ороной туг дорошье һаа, Азиин эрхим барилдаашадай тоодо ороһон буряадуудай гурбадахинь болоно.
Агын уран урлалай һургуулиин байшан соо Агын Буряадай тойрогой болон аймагуудай захиргаануудай түлөөлэгшэд, тамиршад, һоригшод, Арсаланай түрэлхид сугларжа, Азиин абаргые болон һоригшо Бадма Базаровые хүндэлэн ёһолоо. Тус хэмжээ ябуулгада Россиин Федерациин сенатор Баир Жамсуев Арсалан Будажаповта «За заслуги перед Агинским Бурятским округом” гэһэн тэмдэг зүүлгээ. Агын аймагай зүгһөө абаргада адуун бэлэг үгтөө. Арсаланай тоонто - Согто-Хангил нютагайхид 10 толгой хони бэлэглээ. Эдэ шангуудаай хажуугаар абаргада мүнгэн ба үнэтэ бэлэгүүд барюулагдаа.
«Нютагтаа иимэ хүндэтэйгөөр угтуулжа байхада, гоё байна. Үшөө ехээр бэеэ һорижо, мүрысөөнүүдтэ амжалта туйлаха дуран хүрэнэ», - гэжэ Арсалан хэлээ.
Арсалан Будажапов Согто-Хангил нютагта БаирБудажапов ба Кундуз Оморбековагай гэр бүлэдэ 1993 ондо түрэһэн. Тэрэ жааһаа хойшо байрагүйхэн, эрмэлзэлтэй хүбүүн бэлэй. Энээнииень адаглажа, эжынь хүбүүгээ барилдаанай секцидэ Эрдэм Дондоков һоригшодо шаби болгожо үгэһэн юм. Жэлһээ жэлдэ Арсалан барилдаагаа хаянгүй, оролдосотойгоор бэеэ һориһон байна. Саашадаа Олимпиин резервын тамирай һургуулиин һурагша ябахадаа, Агын тойрогой, Үбэр Байгалай хизаарай болон Буряад ороной олон мүрысөөнүүдэй абарга болоо. Һүүлээрнь Улаан-Үдэ хотын барилдаанай һургуулиин шаби болоод, Росси дотор үнгэргэгдэһэн мүрысөөнүүдэй эрхимүүдэй тоодо орожо, олон тоото нэрэ зэргэдэ болон шангуудта хүртэһэн. Росси гүрэнэй барилдаанай суглуулагдамал командада орохонь ехэ хатуу юм. Тиимэһээ 2019 ондо Баир Жамсуевай, Жамсо Лхамажаповай болон бусад зоной туһаар Кыргыз гүрэнэй сборнодо орожо, Арсалан Дэлхэйн мүрысөөнүүдтэ хабаадаха аргатай болоо һэн. Тиигэжэ мүнөө жэл иимэ ехэ амжалта туйлаба.
Азиин мүрысөөнүүдтэ Арсалан шэлэлгэ гаража, финалда Балян Гуравтай уулзаа. Һүүлшын тулалдаан нютаг хүбүүндэмнай тон хатуу байба. Тулалдаанай туршада тамиршад ана-мана барилдажа, харагшадай анхарал шанга баряад байгаа. Түрүүшын тулалдаа Арсалан 2-1 гэһэн очкогоор шүүгээ. Хоёрдохи тулалдаанда Индиин хүбүүн бүхы арга шадалаа гаргажа, хоёр дахин Арсаланай урда ороһон байна. Тиигэшье һаа манай барилдаашан һүүлшын минүтада бүхы дүй дүүршэлөө хэрэглэжэ, 2 балл абажа шадаа.
«Барилдажа байхада бэлэн бэшэ гэжэ булта мэдэнэт. Барилдаха соогоо ехээр эсээб. Хүл дээрээ бодохонь хүндэ болоод байгаа. Тиихэдэ Согто-Хангил тоонтомни һанагдажа, бүхы шадалаа суглуулжа , хүл дээрээ бодоод, һүүлшын 2 балл абажа шадааб», -гэжэ Арсалан хөөрэбэ.
Арсаланай барилдажа байхада тон ехээр һанаагаа зобоһон хүн Дарима нүхэрынь байба. Тэрэ үедэ хээлитээ байбашьеһаа сэхэ дамжуулга һүни хараа юм.
-“ Би ехээр гуниглажа байгаашьеһаа Арсалан дилэжэ гараха гэжэ этигэнди байгааб. Байлдаанай эсэстэ эсээд байна гэжэ харажал байгаа һэн би. Оөрөө барилдадаг байхадаа Арсаланай тархи соонь юун боложо байгааб гэжэ тухайлжайгааб. Нютагай зондо иимэ угтамжа хэһэниинь ехэ баярые хүргэнэб”, гэжэ Дарима хэлэнэ.
Арсалан Будажаповай илалта Агын Буряадай тойрогой барилдаанай һургуулиин арга боломжо, дүн харуулба гээшэ. Саашадаа Арсаланай Олимпиин наадануудта амжалтатай хабаадахань болтогой гэжэ нютагайхид найдана.
