Майн 4-һөө 8 болотор Шэтэ хотодо 18 наһа гүйсөөдүй хүбүүдэй хоорондо дүрэ буляалдаата барилдаагаар Россиин мүрысөөн үнгэргэгдөө. Тус мүрысөөндэ гүрэнэй 400 гаран тамиршад хабаадаба.

Тамирай һайндэрэй урда тээ Агада дүрэ буляалдаата барилдаагаар Дагестанай ахамад һоригшо Асламбек Алиев түрүүтэй һоригшодтой уулзалга эмхидхэгдээ.

Тойрогой Захиргаанай хүтэлбэрилэгшэ Буянто Батомункуев холын айлшадые угтан абаа. Тэрэ холын айлшадта тойрог, нютагаймнай арад зон, тамирай үндэһэн янзануудай хүгжэлтэ тухай хөөрэһэн байна. Барилдаан гээшэ агынхидай эгээл дуратай тамир. Энэ тамираар нютаг бүхэнэй эдиршүүл бэеэ һоридог байна гэжэ айлшад ойлгоо. Дагестанай 40 гаран эдир барилдаашад Агада хоёр долоон хоногой туршада һорилго гараа бшуу. Асламбек Алиевай хэлэһээр, Агада һорилго гарахадаа, интернадта байрлаа, бүхы эрхэ нүхэсэл зохёогдонхой. Алдарта газарнуудаар хүрөө. Тодорхойлходо, дасан, музей, конюшни хараһан байна. Олимпиин хүрэл медальда хүртэһэн Базар Базаргуруевай хүдөө буусада хүрэжэ, моридоор һонирхоо, мори унаһаншье байна. Үбэр Байгалай хизаар ба Дагестан хоёрой дүрэ буляалдаата барилдаанай федерацинууд барилдаашадай холбоо байгуулха тухай хэлсээ. Агын барилдаашад Дагестан ошожо, һорилго хэдэг болобол, дүй дүршэлөө дээшэлүүлхэ аргатай. Хизаарай һоригшодые Дагестан абаашаха баһал шухала. Уулзалгын түгэсхэлдэ Б.Батомункуев холын айлшадта гарай бэлэгүүдые барюулһан байна.

Эрдэни Чимитдоржиев.

You have no rights to post comments