Үнгэрэгшэ амаралтын үдэрнүүдтэ Алхана уулын Ехэ шанда хүртэхын түлөө бүхэ барилдаагаар 16-дахи мүрысөөн үнгэргэгдөө.
Буряад Уласай, Эрхүүгэй можын, Үбэр Байгалай хизаарай, тэрэ тоодо Агын тойрогой - хамта дээрээ 157 бүхэшүүл хаба шадалаа туршалсаһан байна.
Барилдаанай ногоон талмай дээрэ эдиршүүл ба эрэшүүл 10 шэгнүүртэ хубааржа, харагшадай нюдэ хужарлама барилдаа харуулаа.
Эдир шамбай 74 хүбүүдэй дундаһаа Һүдэнтын Чингис Балжимаев ба Сагаан-Уулын Түмэн Жигзымаев гол уулзалга хүрэтэр ошоо. Эндэ Ч.Балжимаев илалта туйлажа, абарга бүхэ болоо.
Бүдүүн зоной хоорондо Агын талын абарганууд Балдан Цыжипов ба Цыбик Максаров финалда уулзажа, Ага-Хангилай барилдаашан абарга бүхэ болоһон байна. Илагша бүхэ Балдан Цыжиповтэ Ехэ шан – 200 мянган түхэриг, кубок, дип-лом барюулагдаа. Мүрысөөнэй абарга бүхэшүүлдэ соло дуудагдаа.
Абарга бүхэшүүл шагнагдаба.
Бэлигтэй фото-сурбалжалагша ябаһан Сергей Доржиевай мүнхэ дурасхаалда зорюулагдажа, «Буряты» гэһэн фото-үзэсхэлэн дэлгээгдээ һэн. Буряадай оперо ба баледэй гол дуушад, Буряад Уласай арадай артистнар Билигма Ринчинова, Бадма Гомбожапов гэгшэд дуу бэлэглэжэ, найр наада шэмэглээ.
Э.ДОРЖИЕВ.
Долгорма ДАШИНИМАЕВАГАЙ фото-зурагууд.
