Россиин Баатар Алдар Цыденжаповай дурасхаалда зорюулагдаһан дүрэ буляалдаата барилдаагаар региональна нээмэл түрүүшын турнир Агын Буряадай тойрогой 85 жэлэй ой угтуулан, Үбэр Байгалай хизаарта соносхогдоһон тамирай 5 жэлэй хэмжээндэ сентябриин 24-дэ Ага тосхоной «Бүргэд» тамирай комплекс соо үнгэргэгдэхэнь.
Мүрысөөн хүүгэдые, эдиршүүлые Эхэ орондоо дуратайгаар хүмүүжүүлхэ, энхэ элүүрые сахиха, эдир тамиршадай шадабари дээшэлүүлхэ, ажаһуугшадые тамирта һожортой болгохо зорилготой юм.
Энэ турнир уялгаяа дүүргэжэ ябаһаар, баатарай үхэлөөр алдалан унаһан сэрэгшэдэй дурасхаалда зорюулагдана. Алдар Цыденжаповай дурасхаалта турнирта 2006 оной ба доошо наһанай хүбүүд 13 шэгнүүртэ мүрысэхэ юм. Уридшалан үгтэһэн мэдээгээр, 250-300-гаад барилдаашад хабаадахаар хараалагдана.
Мүрысөөндэ Буряад, Саха-Яхад оронуудай, Эрхүүгэй можын болон Хабаровска хизаарай тамиршад уригдаха. Һүүлээрнь барилдаашадай хоорондо бүхэ барилдаагаар абаргые элирүүлхэ мүрысөөн үнгэргэгдэхэ юм. Хабаадагша бүхэн заһуултай, буряад хубсаһатай – малгайтай, шуудагтай, бүһэтэй, барилдаашанай гуталтай байха ёһотой.
Һоригшод, шүүгшэд COVID-19 үбшэнһөө вакцинаци баталһан QR-кодтой, харин тамиршад 48 часай урда тээ тушааһан отрицательна ПЦР тесттэй байха эрилтэтэй.
Нордоп БАБУЕВА.
