Уласхоорондын шатарай федераци (ФИДЕ) август һарада дүрбэн россиянуудта нэрэ зэргэнүүдые олгоо гэжэ августын 31-дэ ruchess.ru сайт мэдээсэнэ. Тэрэ тоодо манай нютаг басаган Яна Жаповада ФИДЕ-гэй мастерай нэрэ зэргэ олгогдоо.
Мүн лэ иимэ зэргэдэ Буряад Уласһаа гарбалтай, мүнөө Москва хотодо ажаһуудаг залуу шатаршан Кирилл Базырцыренов хүртөө. Тиихэдэ хоёр тамиршад ФИДЕ-гэй мастерта кандидадууд болоһон байна.
Яна 2017 ондо 9-тэйдөө Сибириин федеральна тойрогой мүрысөөнэй мүнгэн медальда хүртэһэн гэжэ һануулая. 2018 ондо түргэн шатараар Оросой Холбоото Уласай мүрысөө шүүгээ, Европын мүрысөөнэй шангай һуурида хүртөө. 2019 ондо Европын мүрысөөндэ мүнгэн медаль абаа. 2020 ондо юһэн мүрысөөндэ илаад, Европын абарга болоһон. Тэрэнэй һүүлээр Европын Шатарай холбоон Яные ФИДЕ-гэй можонуудай хоорондын уласхоорондын онлайн-турнирта хабаадахыень уряа. 2021 ондо Оросой Холбоото Уласай можын бүридэлдэ шатараар уласхоорондын турнирта 3-дахи һуури эзэлээ. Энэл жэлдэ, 13-тайдаа «Эхэнэр уласхоорондын мастер» гэһэн зэргэдэ дэбжүүлэгдэхэ гурбадахи нормо дүүргээд, Үбэр Байгалда иимэ зэргэтэй ори ганса тамиршан болоо. Оросой Холбоото Уласай тамирай мастерай нэрэ зэргын норматив дүүргээд, энэ жэлэй июль һарада тус нэрэ зэргэнь олгогдоһон байна.
Янын дабшалтын удаадахи шата - гроссмейстерэй нэрэ зэргэ. Энэ шата удахагүй дабахынь тула онсохон һүбэлгэн эдир тамиршанда амжалта хүсэе.
Дарима БАЗАРОВА.
