Ага тосхоной түб стадиондо Агын аймагай хүдөө нютагуудай хоорондо спартакиада һүр жабхалантайгаар үнгэргэгдэһэн байна. Һайндэрэй эхиндэ хүдөө нютагуудай можонууд нээлгын жагсаалда алхалалдаа. Заншалта спартакиадада оло дахин түрүүлһэн, кубогта хүртэһэн эбтэй эетэй Урда-Ага нютагай тамиршад жагсаалые ударидаа. Тэндэ гартаа туг, баннер, шар бариһан мэдээжэ тамиршад, багшанар, һоригшод, хүдөө ажахын хүдэлмэрилэгшэд, тамирай ветеранууд, оюутад трибунын урдуур алхалалдаа. Тэдэнэй удаа хоёрдохи ба гурбадахи һууринуудта гараһан Будаланай, Һүдэнтын тамиршад жагсаалда ябаһан байна. Дүн хамта аймагай 13 хүдөө нютаг нээлгын жагсаалда ябаа һэн. Агын аймагай захиргаанай толгойлогшо Насак Бабужапов «Зунай нааданай» һайндэрөөр нютагайхидаа амаршалаад, заншалта спартакиадые нээһэндэ тоолоо. Аймагай хүгжэлтэдэ горитойхон хубита оруулһан зарим эрхэтэдтэ һайндэрэй туг үргөөд ябаха, бодхоохо эрхэ олгогдоо.

You have no rights to post comments