Тиихэдэ Будалан нютагай Шойжилова Эльвира басаган Һүдэнтын нэгэ басагантай, Цыбжит гэжэ нэрэтэй hэн бэшэ аа гү гэжэ hананаб, үдэр бүри теннис наададаг hэн.
Ехэл бэрхээр, гоёор наададаг байгаа ёhотой, hонирхожол харадаг hэм. Наадажа үзөөгүйб, тиибэшье нэгэтэ Эля намда ракеткэ барюулжа үзөө бэлэй… Тэрэ гэhээр лэ Эля Шойжиловаhаа бэрхээр теннис наададаг хүн үгы ха гэжэ ухаандамни ехэл хадуугдаа.
Саашадаа тамирай энэ янзаар нэгэтэшье hонирхоогүй аад, таби наһа гаража, hуудаг ажалhаа боложо, хүзүүнэй шалаа гаргахын тула теннис наадахада туһатай гүүлэһэн байнаб. Тиигэжэ гансата ухаандамни «Нарасун» лагерьта байhан хаhа hанагдажа, гурим дүримүүдыеньшье мэдэхэгүй аад, Эля шэнгеэр наадаха хүсэлдэ абтаа бэлэйб.
Дэлхэйн одото тамиршадые мэдэхэшьегүйб, ододһоо болохо орон нютагайнгаа бэлигтэй, бэрхэ теннисистнүүдые таниха, мэдэхэ бэшэб. Тиимэhээл эндэ hая Агада болоhон столой теннисээр мүрысөөндэ «минии одон» Эльвира Шойжиловатай нюур нюураараа урда урдаhаа наадаха зол тудаа. Балшар багадаа ехэл hайшааhан нүхэртэеэ ушарhандаа, һанаhандаа, hарбайhандаа хүрэhэндөө, ямар жаргалтай байба гээшэбиб?!
Хэдэн олон жэлэй үнгэрhэн хойно дүрэтэй тамиршан, мүнөө болоходо, уран зурагай бэлигтэй бэрхэ багша Эльвира Андреевна Шойжилова тэрэл зандаханаа, урин налгайхан, даруу номгохон, теннис аргагүй бэрхээр наадажал ябана, омогорхоноб.
Хүдөөгэй тамиршадай ябадал зугаатай
Энэл ушарhаа уламжалан, hургуулиин хаhа hанагдажа, ехэл hонин мэдэрэлнүүд түрөө, дурсалганууд hанаанда ороо. Үглөөгүүр Хүнхэрhөө нютагайнгаа суглуулагдамал можын бүридэлдэ столой теннисээр мүрысөөндэ Ага ошолго...
Теэд тэрэ үеын мүрысөөнүүд, шүүhэн ба шүүгдэhэн үйлэ ушарнууд мартагдаа шахуу. Гансал харгыдаа ходо hааташадаг унаатай байhамнай hанагдаба. Автобус гү, али «53» түхэлэй машинааршье ябаха ушарнууд тудадаг һэн. Даараhан, зобоhоноо нэгэшье hананагүйб. Харгыдаа хүршэ Будаланай үхибүүдтэй уулзаад лэ, жолоошодой машинаа заhаха үедэ аргагүй жаргалтайнууд, харгын захада «третий лишний» наадажал байгша hэмди. Таня Тумуровагай хонгёо энеэдэн гансата ухаандамни ороно, урихан Таня Цырендоржиева, шангахан Оксана Баханова, бэшэнүүдэй нэрэнүүдые мартааб, зүгөөр олоной эдир сарюухан шарай элеэр hанаанда ороно.
Мүнөө Будалан нютагта Владимир Жапович Жаповай хорёо соо байhан багахан гэр байдаг ха гү? Энэ гэр бүлын халуун эдеэ хоол хэшэгтэ одоол нилээд хүртэhэн байнабди! Үнөөхил машинамнай эбдэрхэ, али гэбэл хүршэнэртэеэ Будалан хүрэжэ, тэрэ гэр соо халуун эдеэ шанажа эдеэлээд, наадаад, hажажа эхилээд байхадамнай, маанадай хойноhоо унаа ерэдэг бэлэй. Орой үдэшэ юм ааб даа. Юрэ ябаашад бэшэбди, Базар Дариев, Соёл Дамдинжапов, Цыпелма Цыренова гэгшэд нэгэтэ бэшэ амжалтануудые туйладаг шанга тамиршаднай байгаа. Урда тээнь 1965 оной Люба Раднаева, Бато Лхасаранов, Санжа Жамбалдоржиев, Цырендоржи Дариев, Батор Бальжиев болон бусад нютаг можодоо мэдээжэ тамиршад hэн. Эдэ аха, эгэшэнэртэ хүрөөшьегүй hаа, бидэ дутуугүйл ябаха гэжэ оролдодог байгаабди.
Тиихэдэ аба эжымнай «Номоо үзөө гүш?», «Ажалаа хээ гүш?» гэжэ нэгэтэшье асуудаггүй һэн, юуб гэхэдэ тэрэ hорилго, наадандаа ошохын тула газаахи ажалаа хэжэ, номоо үзэжэ үрдиhэн байхаш.
Хүнхэрэй hургуулиин физическэ культурын багшанар Базаржап Хончинович Бадараев, Василий Борисович Аюшеев, Арсалан Цыренович Жигмитов, Батомунко Ухинович Базаров болон бусадай ашаар тамирай элдэб янзануудаар бэеэ һорижо, наадажа hураад, үе үеынгөө нүхэдтэй танилсажа, наhан соо-гоо харилсажа ябана гээшэбди.
Ешигма Цыбенова.
Авторай архивай фото-зураг.
