«Бүргэд» тамирай байшан соо шамбайшуул бэеэ хүдэржүүлээ
   Августын тэнгээр Ага тосхоной «Бүргэд» тамирай байшан соо хүймөөтэй, шууяатай байгаа. Эндэ августын 18-һаа 28 болотор тосхоной, Амидхааша нютагай 40 эдир шамбайшуул һорилгын хэшээлнүүдые гараа. Тамирай байшанда эдир хүбүүд бэрхэ һоригшодой хүмүүжэл доро һорилго гаража, бэе махабадаа бэхижүүлээ бшуу. Хүбүүд хүдэр шамбай бэетэй боложо, һургуулиин шэнэ хаһадаа эршэ хүсэ шадал абажа оробо гээшэ. Үдэ багта тамирай байшан ороходо, хибэс дээрэ тамиршад барилдаанай шэнэ дүримүүдтэ һуража байгаа. Һоригшод шабинартаа дүримүүдые заана.
   Эндэ һая 75 наһаяа гүйсэһэн, Россиин габьяата һоригшо Бато Базаров наһанайнгаа дуратай ажал ябуулһаар. Бато Бадмаевич багшын талаhаа ехэ сэнтэй заабаринуудые үгэдэг. Дүй дүршэлтэйхэн болоһон хүбүүдтэ мүрысөөнүүдтэ хэhэн алдуунуудыень ойлгуулжа ба заажа үгэдэг. Барилдааша хүбүүдэй дунда шуран солбон, урагшаа hанаатай, hанаhан юумэеэ заабол дүүргэхэ гэжэ оролдодог бүхэшүүл олон. Зарим хүүгэдэй сэнгэлгын газараар бэеэ hамааруулхада, эдэ шамбайшуул тамир, hорилго шэлэдэг. Тамиршад эдир багаhаа барилдаанда бүхыгөөрөө оролдожо ябана. Иигээд оролдожо ябаа hаа, бэлигтэй барилдаашад заатагүй болохо бшуу. Бэрхэ барилдаашад болоһон хүбүүдhээ тэдэнэр жэшээ абажа, тэдэнэй зэргэдэ хүрэхэеэ эрмэлзэдэг. Россиин, хизаарай мүрысөөнүүдтэ амжалтатай барилдахань дамжаггүй. Тэдэнэй дунда тамирша аба, эжытэй үхибүүд эндэ олон ябана гэжэ ойлгогдоо. Тэдэнэр гэртэхинэйнгээ тамирта дуратайень абажа, тамиршан боложо ябана.
   Арбан хоногой туршада тамирай байшан соо сугларжа, үдэрэй хоёр удаа хибэс дээрэ hорилгонуудые хэнэ. Үдэр бүри кросс гүйлдэнэ, футбол наадана. Тамирай байшанай танхим соо барилдахын хажуугаар боксоор hонирходог, элдэб тренажёроор бэеэ hоридог, штанга, гиир үргэдэг байна. Сүлөөгүй бэеэ һори-хын хажуугаар тамиршад халуун хоолоор хангагдана. Балдан Содномов, Мунко Санжиев гэгшэ залуу бэрхэ һоригшод үхибүүдтэ барилдаанай дүримүүдые заана.
   Балдан Содномов дээдэ категориин багша юм. Тэрэ сүлөөтэ барилдаагаар тамирай мастер. Мэдээжэ бүхэ хүүгэдэй тамирай hургуулида тамиршан-инструктораар олон жэлдэ амжалтатай ажаллана. Хибэс дээрэ залуу хүбүүдые барилдаанай дүрэ, техникэдэ hургадаг.

You have no rights to post comments