2012 онһоо хойшо энэ мүрысөөн нэгэшье таһалдангүй, арбан гурбадахи жэлээ үндэр хэмжээндэ дахяад эмхидхэгдээ. Арбан дүрбэн жэлэй саана, хорин гурбан наһандаа тамирай орьёл дээрэ ябаһан Аюр Абидуев гэнтын аюулда дайрагдажа, наһантаяа хахасаа һэн. Нүхэдынь, һоригшодынь залуу тамиршанай нэрэ мүнхэлхэ зорилготойгоор дурасхаалай мүрысөө байгуулха үүсхэл гаргаһан байна. Нэн түрүүн үүсхэл гаргагшад Аюрай гэртэхин Цыренжаб ба Соёлма Абидуевтанһаа зүбшөөл абаа. Удаань тамирай хороонһоо, засаг зургаанһаа дэмжэлтэ абажа, мүрысөөн эмхидхэгдэжэ эхилһэн түүхэтэй.
   Аюр Абидуев алтан дэлхэй дээрэ богони наһа эдлэбэшье, нэрээ нэрлүүлжэ, Ага нютагаа суурхуулжа үрдиһэн байна. Амжалта илалтануудаараа холо ойгуур мэдээжэ болоһон юм. Тэрэ Могойто тосхондо 1989 оной декабриин 8-да түрэһэн намтартай. Уг удамынь – һур харбаанда улигтай зон. Абидуева Соёлма эжынь һур харбалгаар Россиин габьяата һоригшо, мүнөө хизаарай ахамад һоригшоор ажалладаг. Ринчинцынгуев Владимир нагаса абань Агын Буряадай тойрогой хүүгэдэй ба эдиршүүлэй тамирай һургуулиин захирал ябаһан, һур харбалгаар уласхоорондын классай тамирай мастерай нэрэ зэргэтэй ябаа. Аюр Могойто тосхондо һуража байхадаа, мэдээжэ һоригшо Галина Архиповада заалгажа, харбажа һураһан. Һүүлдэ гэр бүлэтэеэ Ага тосхон зөөжэ, түрэһэн эжынгээ харууһан доро һорилгоёо үргэлжэлүүлээ. Агын тойрогой гимнази дүүргээд, Шэтын багшанарай дээдэ һургуулида һуража байхадаа, бүри бэрхээр харбажа һураһан шуу. Россиин Зэбсэгтэ Хүсэнүүдэй мүрысөөнүүдтэ хабаадажа, нэгэтэ бэшэ илагша болоһон ба шангай һууринуудта гараһан юм.
   «Хүбүүнэйнгээ бэрхээр харбажа эхилхэдэ, бидэ, гэртэхиниинь, блочно номо абаа һэмди. Аюр тэрэ бэлэгээ ехэ наринаар хадагалжа ябаһан. Тэрэ һурша номонь мүнөөшье болотор хадагалаатай байдаг. Аша хүбүүмнай Чингис абынгаа номоор харбадаг. Аюр мүрысөөн бүхэндэ хабаадахадаа, амжалта туйладаг һэн. Би түрүүшын үедэ хүбүүгээ дахажа, мүрысөөнүүдтэ ябалсадаг байгааб. Удангүй бүдүүн болоходоо, өөрөө суг харбадаг тамиршадтаяа мүрысөөнүүдтэ ябадаг болоо һэн. Шэтэдэ һуража байхадаа, оюутадай хоорондо Россиин, Европын, дэлхэйн мүрысөөнүүдтэ эрхимээр хабаадажа ябаһан. Бидэ, гэртэхиниинь, хүбүүнэйнгээ амжалтаар ехэ омогорходог, бахархадаг һэмди. Хайрата хүбүүнэймнай хара залуугаар бидэнһээ хахасажа ошоһониинь харамтай. Мүнөө мэндэ ябаа һаа, бэрхэ һоригшо болоод ябаха һэн гэжэ һанагшаб. Аша хүбүүмнай угайнгаа харгыгаар бэрхэ тамиршан болонхой. Һур харбалгаар уласхоорондын классай тамирай мастерай нэрэ зэргэтэй. Теэд үнэмшэлгэеэ абаадүй байнабди. Аюр хүбүүнэймнай һаруул дурасхаалай мүрысөө эмхидхэлгэдэ горитойхон туһа хүргэдэг бүхы зондо гэр бүлын зүгһөө халуун баярые доро дохин хүргэнэбди. Нэн түрүүн тойрогой Захиргаанай хүтэлбэрилэгшын уялга дүүргэгшэ Ананда Дондоковто баяраа мэдүүлнэбди. Ананда Цыдыпович Ага тосхоной захиргаанай толгойлогшо, хизаарай һур харбаанай федерациин юрэнхылэгшэ ябахадаа, бидэндэ алишье талаар туһа хүргэһэн ба мүнөөшье хүргэдэг гээшэ. Түрүүн нютаг можонууд хоорондын мүрысөөн байһанаа, мүнөө бүхэроссиин хэмжээнэй болоо. Ананда Дондоковой, мүнөө хизаарай ба Россиин һур харбаанай федерацинуудай юрэнхылэгшэд болоһон Чингис Цыреновэй, Зоригто Манхановай, хизаарай һур харбаанай ахамад һоригшо Балта Цынгуевай ба бусадай аша оролдолго тэмдэглэхээр», - гэжэ Аюрай эжы Соёлма Абидуева хөөрөө.

You have no rights to post comments