Нютаг хүбүүн, «Сапсан» ООО-гой генеральна захирал Баир Сариевай, адуушадай үүсхэлээр, эмхидхэлгээр ба нютагайхидай дэмжэлтээр Хара-Шэбэрэй түбһөө урагшаа, харгын урда тээ жэгдэ газарта оршодог хуушан ипподром эбтэй эетэй арад зоной мүнгэн туһаламжаар һэльбэн шэнэлэгдээ. 1600 метрэй дүхэриг, хушалтатай трибунанууд, моридые байлгаха газарнууд, айлшадые угтаха модон сэргэ зохёогдоо.
   Энэ хадаа миин лэ мори урилдаанай талмай бэшэ, элинсэгэймнай үндэһэ һуури табиһан заншалнуудые хүндэлэлгэ болоно гэжэ сугларагшад мэдэрнэ. Мори урилдаанай һайндэрэй Россиин арадуудай нэгэдэлэй жэлдэ үнгэргэгдэжэ байһаниинь ехэ удха шанартай. Юуб гэхэдэ, Хара-Шэбэр нютагта олон ондоо үндэһэ яһатан хэлэ, соёл болон ёһо заншалаа сахин, эбтэй эетэй ажаһуудаг, тиимэһээ хани барисаанай һаруул жэшээ боложо үгэнэ. «Россиин арадуудай нэгэдэлэй хүсэ ба һүлдэ болон шахаа тангаригта үнэн сэхэ байлгые сэрэгэй тусхай үйлэ хэрэгтэ сэрэгшэднай харуулна. Сэрэгшын ба эрхэтэнэй уялга дүүргэжэ, алдалан унаһан сэрэгшэдэймнай дурасхаал хэтэ мүнхэ зүрхэ сэдьхэлдэмнай үлэхэ», - гээд тэмдэглэгдэжэ, сэрэгэй тусхай үйлэ хэрэгтэ алдалан унаһан сэрэгшэдэй дурасхаал хүндэлэн, минутын туршада дуугүй байлга соносхогдоо.
   Могойтын муниципальна тойрогто морин ажахы хүгжөөлгын түрүүшүүлэй тоодо Хара-Шэбэр нютагай адуушад олон юм. Мүнөөнэй гүйгөөшэ моридые үдхэлгын түүхэ Кировэй нэрэмжэтэ колхозой түрүүлэгшэ ябаһан Бальжинима Мажиевтай нягта холбоотой. Тэрэнэй туһаар Хара-Шэбэр руу гүйгөөшэ үүлтэрэй морид асарагдаһан. 1950-яад онуудһаа эхилжэ, мүнөө болотор Хара-Шэбэрэй гүйгөөшэ морид аймагай, тойрогой болон зональна, мүн «Алтаргана» уласхоорондын нааданай урилдаануудай илагшад болодог. Гүйгөөшэ моридые үдхэлгэдэ урма зоригтой, моридто дуратай, урагшаа һанаатай хүнүүдэй үзэл, залуушуулые арадайнгаа заншалнуудта хандуулха, тоонто нютагаа суурхуулха хүсэлтэй хүдөөгэй юрын зон ехэ нүлөө үзүүлээ юм. Тэдэ мүнөөдэрэй илалтануудта асараа.

You have no rights to post comments