Дэлхэйн хоёрдохи дайнда илагдаха дүтэлhэнөө ойлгоходоо, Германи, Итали, Япони гүрэнүүд дайшалхы шэнэ аргануудые бэдэржэ эхилhэн түүхэтэй. Германи «ФАУ-2» гэhэн шэнэ ракетэнүүдтээ найдаhан, харин японцууд «камикадзе» гэжэ бэеэ зорюута үхэлэй аюулда оруу-лагша сэрэгэй лётчигууднай илалтын хэрэг дүтэлүүлхэ гэhэн ехэ этигэлтэй байгаа.
Нээрээшье, хэдэн зуугаад жэлэй туршада япон камикадзенууд дэлхэй дээрэ эгээл эрэлхэг ба дүрэ шадабаритай-нууд гэжэ тоологдодог байhан. Тэдэнь манай ээрын урда тээхи 660-дахи жэлдэ ажаhууhан Дзимму императорhаа эхи абаһан түүхэтэй. Императорнууд - тэнгэриин Наранhаа гарбалтай, тусхай үүргэтэй мүндэлhэн амиды бурхад, тэдээндэ hүгэдэн мүргэхэнь Тэнгэриин бурхадта шүтэhэнтэй адли гэжэ японцууд этигэдэг байгаа.
IX-XII зуун жэлнүүдтэ «харакири» («гэдэhээ хаха отололго») гэhэн самурайнуудай заншал бии болоhон. Тэрээгээр, муу эшхэбтэр, тулюур ябадалаар нэрэ түрэеэ алдаhан самурай hэлмээр гэдэhэеэ хахалдаг гуримтай байгаа. Юундэ гэдэhэеэб гэбэл, тэрэнь хүнэй бэеын гурбадахи «наранай» чакрын hууритай тудалдана.
Буряад арадай «Нэрээ хухаранхаар, яhаа хухара» гэhэн оньhон үгэ «Нэрээ хухаранхаар, гэдэhээ хахала» гэhэн япон үгэтэй адли удхатай.
1944 ондо Япониин армида үхэлэй аюулда зорюута бэеэ үгэхэ үүргэтэй лётчик-камикадзенуудhаа бүридэhэн тусхай отрядууд байгуулагдаhан.
«Камикадзе» гэһэн үгэ «бурханай hалхин» гээд оршуулагдадаг. 1274 ба 1281 онуудта Монголой Хубилай хаанай далайн сэрэгэй онгосонууд дайшалхы хүсэлтэйгөөр Япониин эрьенүүдтэ дүтэлhэн түүхэтэй. Теэд түрүүн, һүүлдэньшье һэдэлгэнүүдые хэхэдэнь, гэнтэ шанга тайфун буужа, Монголой онгосонуудые бута сохиhон гэдэг. Японцууд тэрэ тайфуниие «Бурханай hалхин» гэжэ нэрлэhэн.
Камикадзенууд олонхи ушарта америкын далайн сэрэгтэй тэмсэhэн гэжэ эли. Эгээл түрүүшынхеэ 1944 оной октябриин 21-дэ болоһон байлдаанда Австралиин ударидагша крейсертэ камикадзе добтолhон.
«Мандаhан Наранай» оронойхид сэдьхэлэй үндэр мэдэрэлэй ба сүхэршэгүй урма зоригой хүсөөр мүнөөнэй сэрэгэй машинануудые илахабди гэhэн ехэ эти-гэлтэй байгаа. 1944 ондо япон сэрэгтэ 10000 камикадзенууд байhан. Тэдэнэй ехэнхи хубинь университедүүдэй эдир залуу оюутад байhан ушартай.
«Лётчигууд-камикадзенуудhаа» гадуур «торпедо-хүнүүд», «мина-хүнүүд», «парашютист-камикадзе», «уhан дээрэхи камикадзенууд», «уhан дорохи камикадзенууд» г.м. байhан.
«Уhан дээрэхи хризантема» гэhэн үнжэгэн сэсэгэй нэрэтэй «торпедо-хүнүүд» иимэ һэн: торпедын хамар талаар дүүрэн тэhэрэлгын зүйлнүүд хээтэй, харин ара таладань камикадзе-хүн хэбтээд, торпедоор хүтэлбэрилдэг байгаа. «Торпедо-хүнүүд» американ сэрэгтэ ехэхэн хохидол үзүүлhэн гэжэ эли.
Тэруо Ямагути гэжэ 20 наhатай мичман-камикадзе гэртээ эльгээһэн бэшэг соогоо иигэжэ бэшэнэ: «Түрэл Япониин түлөө ами наhаяа үгэхэнь – ехэ жаргал!»
1945 ондо Япониин олтирогууд дээрэ уhан доогуур тамардаг 250 бага онгосо, «Кайтен» гэһэн 500 торпедо, «Синье» гэжэ өөрөө тэһэрдэг катернуудай хажуугаар 6000 водолазууд-камикадзе, 10000 лётчигууд-камикадзе байлдаанда орохо бэлэн байгаа.
Иимэ ехэ бэлэдхэлтэй сэрэгые илаhан совет сэрэгшэдтэ алдар соло!
