Февралиин 12-19-дэ Америкэдэ үнгэргэгдэhэн hур харбалгаар Дэлхэйн Кубогай түлөө мүрысөөнүүдтэ Забайкалиин хизаарай тамиршад амжалтатай хабаадажа, ялас гэмэ илалтануудаараа баярлуулба.
С.Цыремпилова.
Америкын Лас-Вегас хотодо Саяна Цыремпилова хубиин мүрысөөндэ 2-дохи hуури эзэлээд, Дэлхэйн Кубогай мүнгэн медаль шүүжэ ерэбэ. Саяна Италиин ба Урда Солонгосой абарга тамиршадые классическа hурша номоор диилэжэ, финалда гараа. Харин финальна тулалдаанда Германиин Лиза Унрух гэhэн тамиршанда 2:6 тоогоор шүүгдэжэ, хоёрдохи шанда хүртөө.
Мүн лэ тэдэ үдэрнүүдтэ Америкын Янктон хотодо Саяна Цыремпилова ба Туяна Дашидоржиева хоёр мэргэнээр харбажа, Россиин можодо Дэлхэйн чемпионадай хоёр мүнгэн медаль асарhан габьяатай.
Саяна Цыремпилова 1993 ондо Шэтэ хотодо түрэhэн, сагаан хурьган хуасай омогой басаган. Элинсэгэйнгээ гуламтын түүдэг, буряад арадайнгаа hүр hүлдэ эршэмтэйгээр бадарааhан оюун бэлигтэй хүүхэн. Эсэгэнь Дулдаргын аймагай Үзөөн нютагай Цыремпилэй Галсан юм. Эжынь, Эрдэниин Должин, Могойтын аймагай Хара-Шэбэр нютагhаа гарбалтай.
Мүнөө Саяна эжытэеэ ба Батоболот, Зоригто дүү хүбүүдтэеэ хамта Шэтэ хотодо ажаhуудаг. 11 наhатайhаа hур харбажа эхилhэн. Тамирша басаганай одо заяанайнь харгы аза талаантай ушарнуудаар баян.
2000 он… Гэр бүлэнь хотын Красной Звезды гудамжаар 26/14 гэhэн хаягаар шэнэ квартирада зөөжэ оробо. Тэрэ гэртэнь, нэгэл подъезддэ Мунко-Бадра Дашицыренов ба Светлана Жигжитова гэhэн элитэ hур харбагшадай габьяата бүлэ ажаhуудаг байгаа. Тэрэ сагта мобильна телефон hая бии боложо, хоморой хэрэгсэлнүүдэй тоодо байhан гэжэ эли. Нэгэтэ 2003 ондо яаралтай шухала ушараар Саяна суутай хүршэнэртөө тоншожо, Светлана Батоевнаhаа телефоноороо хонходуулхыень зүбшөөл гуйhан юм. Тэрэнь зүбшөөгөөд, басагые айлшадай таһаг руугаа урижа оруулба ха...
Дэлгэрэнгыгээр 10-дахи дугаарта.
Энэ хаягаар электронно захил хэхэ аргатайт: Адрес электронной почты защищен от спам-ботов. Для просмотра адреса в вашем браузере должен быть включен Javascript.
