Мартын 23-25-ай үдэрнүүдтэ Могойто тосхоной «Баяр» байшан соо Бүхэроссиин хэмжээнэй тамирай һайндэр дахяад эмхидхэгдээ.
М-Б.Дашицыреновэй түрэлхид.
Һара урид багжагар шадалтай бүхэшүүл Советскэ Союзай Герой Базар Ринчиногой дурасхаалай шанда хүртэхын түлөө барилдаагаар дүрэеэ буляалдаһан байна. Эндэ һая Росси гүрэнэй олон нютагуудһаа хёрхо мэргэшүүл сугларжа, блочно ба классическа номонуудаар эрхимүүдээ элирүүлээ. Ага нютагай үзүүр хүбүүдэй нэгэн ябаһан, Россиин, Забайкалиин һур харбалгын түүхэдэ нэрэеэ мүнхэлһэн, СССР-эй тамирай габьяата мастер, «Дружба - 84» нааданай илагша, «Хүндэлэлэй тэмдэг» орденой кавалер Мунко-Бадра Дашицыреновэй мүнхэ дурасхаалай 15-дахи заншалта мүрысөөн үнгэргэгдэһэн байна. Саха-Яхад, Буряад оронуудһаа, Москвагай, Эрхүүгэй можонуудһаа, Забайкалиин хизаарай, Агын тойрогой хүдөө нютагуудһаа 200 гаран тамиршад мүрысөөндэ хабаадаа. Һур харбаашадай дунда тамирай габьяата хоёр, уласхоо-рондын классай юһэн, тамирай дүшэн мастернууд хабаадажа, мүрысөө шэмэглэһэн байна. Буянта наһа эдлэжэ ябаһан Батомунко Дашицыренович ба Димит Жимбуевна Мунко-Бадра хүбүүнэйнгээ дурасхаалта мүрысөөндэ жэл бүри уригдажа, хүндэтэ айлшад болодог.
Хайрата хүбүүниинь залуугаар алтан дэлхэйтэеэ хахасаһан, Светлана нүхэртэй, Ирина басагатай байһан. Нүхэрынь Светлана Жигжитова мүнөө талаан бэлигтэй һоригшо, Олимпиин мүнгэн медальда хүртэһэн Туяна Дашидоржиевагай багша. Энэ жэлэй мүрысөөндэ Светлана Жигжитова хабаадаагүй: ушар гэхэдэ, Россиин һур харбаашадтай Турци гүрэн ошоһон байгаа. Һур харбааша бүлын басаган Ирина Дашицыренова (Богданова) һоригшын ажал шэлэжэ, эдир үетэниие һур харбаанда һургадаг.
… Гурбан үдэрэй туршада үргэлжэлһэн мүрысөөнэй дүнгүүдые согсолходо, Зугаалайн тамирай һургуулиин хүмүүжэмэл, уласхоорондын классай тамирай мастер Бэлигто Цынгуев оло дахин «арба» оножо, хүйхэрэй мэргэн болоһон байна. Һоригшодой хоорондын мүрысөөндэ Шэтын һоригшо Бадма Батоев абарга боложо шадаа. Тус мүрысөөнэй дүнгөөр, Дулдаргын аймагай Буянто Осоров, Эрхүүгэй тамиршан Никита Коковин эрхим харбажа, тамирай мастерай нэрэ зэргэнүүдтэ хүртэһэн байна. Можын мүрысөөнэй дүнгүүд дээрэ тогтоходо, классическа номоор эрэшүүлэй хоорондо Ага тосхоной ЦСП-гэйхид шалгараа. Тэдэнэй удаа Шэтын ЗабГУ, Агын «Тамир» можынхид болоо. Эхэнэрнүүдэй хоорондо Агын аймагай, ЗабГУ-гай, Эрхүүгэй можын һуршад эрхимлэжэ, шангуудта хүртөө һэн. Блочно номоор эрэшүүлэй ба эхэнэрнүүдэй дунда Шэтын ЦСКА-гайхид түрүүшын һууринуудта гараа. Хизаарай, ЗабГУ-гай тамиршад эрэшүүлэй ба эхэнэрнүүдэйшье дунда 2-дохи, 3-дахи һууринуудые тус тустаа эзэлһэн байха юм. Хубиин харбаанда илагшадые ба шангуудта хүртэгшэдые нэрлэбэл, классическа номоор хүбүүдэй хоорондо түрэл хизаарай тамиршад Буянто Цырендоржиев, Зоригто Жаргалов, Соёл Саганов эрхимүүд болоо бшуу. Харин басагадай дунда хизаарай түлөөлэгшэд Валерия Мыльникова, Арина Михайлова, Руфина Тумурова гэгшэд ендэр дээрэ гаража, шагналнуудта хүртэһэн байна. Блочно номоор дэлхэйн абарга Александр Дамбаев хүбүүдэй хоорондо оройлоо. Сашын удаа нэгэ можодо харбаһан Алдар Аюшеев, Лубсан Аюров 2-дохи, 3-дахи һууринуудые эзэлээ. Басагадай дунда баһал хизаараймнай Светлана Зверева, Екатерина Козлова, Дарья Перфильева гэгшэд шалгараа.
