Цыден 1991 ондо Жаргал Жербаевай ба Цырегма Нанзатовагай зохёохы эрмэлзэлтэй гэр бүлэдэ түрэһэн юм.Тосхонойнгоо Ю.Б.Шагдаровай нэрэмжэтэ 2-дохи дунда һургуули дүүргээд, Санкт-Петербург хото ошожо, А.И.Герценэй нэрэмжэтэ Россиин гүрэнэй багшанарай университедэй оюутан боложо, дээдэ һургуулида һуралсалаа эхилээ. Һургуулиин һурагша байһан үеһөө жэл бүри шахуу эрдэмэй дүршэл абалгын конференцинүүдтэ, уран һайханай харалгануудта, тосхоной ба хизаарай зохёохы урилдаануудта болон соёлой хэмжээ ябуулгануудта хабаададаг эдэбхитэй хүбүүн юм. Хажуугаарнь гар тулалдаанай тамирай секцидэ бэеэ һоридог байһан.

Холын газарта шударгы хүбүүн Агынгаа нютаг зоной эблэлэй гэшүүн боложо, баһал эдэбхитэйгээр элдэб янзын хэмжээ ябуулгануудта хабаадаһан юм. Түрүүшын курсһаа Цыден гэртэхинһээ туһаламжа эрижэ байнгүй, өөрөө мүнгэ олохо ябуулга хэжэ эхилһэн байна. Табан жэл соо залуу хүбүүн барилгашанаар, хүтэлэн ябуулагшаар болон бэшэшье элдэб янзын ажалда хүдэлһэн. Тэрэл сагта Цыден юумэ һайн шанартайгаар, анхаралтайгаар хээ һаа, бүхы юумэн урагшатайгаар бүтэхэ гэһэн шухала тобшолол өөртөө гаргаһан.

Дээдэ һургуулиин һүүлээр Цыден сэрэгэй албанда татагдаа. Тэрэ сагта хараа бодолынь мүлигдэжэ, бэеэ хайрлангүйгөөр ажал ябуулха журамтай болоо.

Армиһаа ерээд, хото руу жүдхөө бэшэ, Ушарбайн дунда һургуулида директорэй хүмүүжүүлгын талаар орлогшын тушаалда ажаллажа эхилээ. Хүдөө һууринда Цыден үзэһэн мэдэһэн юумэеэ хүүгэдтэ харуулха, мэдүүлхэ, үзүүлхэ түсэб урдаа табяад, һурагшадые дахуулжа, Россиин, хизаарай болон тойрогой элдэб хэмжээ ябуулгануудта хабаададаг болобо. Гурбан жэл соо грантнуудта хүртэхэ ябуулгануудые хээ, КВН наададаг бүлгэм һэргээгээ, эрдэмэй-дүршэл абалгын конференцинүүдтэ һурагшадаа бэлдээ, һургуулидаа һонин хэмжээ ябуулгануудые эмхидхээ. Хажуугаарнь «Пространство и развитие» гэһэн Россиин залуушуулай холбооной Москва хотодо бэелүүлэгдэһэн түлэблэлдэ гурба дахин хабаадаһан, уласхоорондын хүдөө һуурингуудай залуушуулай конгресстэ Казань ошожо ерэһэн. Тэрэ сагта «Молодёжь Аги» залуушуулай эмхиин юрэнхылэгшэ боложо, эдэбхитэй ажабайдалаа үргэлжэлүүлһэн байна. Энэ эмхиин гэшүүдтэй «Бадминтон и детское зрение» гэһэн түлэблэлөөр грант шүүһэн юм.
Һүүлээрнь Цыден Жербаев Могойтоёо ерэжэ, аймагай захиргаанай мэргэжэлтэн болоо. Мүнөө аймагайнгаа залуушуулай ударидагша болонхой, урдаа олон түсэбүүдые табин, ажалаа ябуулна.

- Яагаад амжалта туйлахаб гэхэдэ, үдэр бүри юумэндэ һуража, оролдосотойгоор ажалаа ябуулжа, залхуугаа диилэжэ, байдалаа һонин болгожо байха ёһотой. Хажуугаарнь ямаршье ажал хээ һаа, һайнаар хэхэ ёһотой.

Жэшээнь, США-гай юрэнхылэгшэ Барак Обамын НАСА-гай байшан ороходо, урдань шала угаагша һамган байба. «Юу хэнэбта?» гэһэн асуудалда тэрэ эхэнэр «астронавтнуудые замбуулин руу эльгээхыень туһалнаб» гэжэ харюусаһан. Энээнһээ уламжалан, хэһэн ажалаа хэрэгтэй гэжэ һанаагүй һаа, ажалтнай хүндэ байха.

Ямаршье газарта - хүдөө һуурин гү, хотодо гү, амжалта туйлахаар юм. Шухалань - хүсэл гээшэ, - гэжэ Цыден Жербаев залуушуулда хандаба.

You have no rights to post comments