Цымжидма Гомбоева Хүһөөшэ нютагта улаалзай хүбдүүд омогой Этигэлэй Мичигэй Дамдинцыренэй бүлэдэ гурбан басагадай дундахи боложо, 1985 ондо түрэһэн юм. Нютагайнгаа дунда һургуулиин һүүлээр Эрхүүгэй университедэй буряад хэлэ бэшэгэй таһаг түгэсхэһэн байна. Һүүлээрнь нютагайнгаа «Огонёк» хүүгэдэй сэсэрлигтэ 2005 онһоо хүмүүжүүлэгшээр ажалайнгаа намтар эхилээ һэн. Удаань Ага тосхоной «Родничок» сэсэрлигтэ, мүнөө 5-дахи жэлээ «Багульник» сэсэрлигтэ хүмүүжүүлэгшээр болон ахалагша ба бэлэдхэлэй бүлэгүүдтэ буряад хэлэнэй багшаар хүдэлнэ. Үшөө нэмэжэ хэлэхэдэ, Дондок нүхэртэеэ хоёр басагадые хүмүүжүүлнэ.

Цымжидма Гомбоевагай хөөрэһөөр, сэсэрлигэй үхибүүд 5 наhанhаа буряад хэлэ үзэжэ эхилдэг. Багашуулай бүлгэ-мэй үхибүүдтэй хүмүүжүүлэгшэдынь хубсаhаа тайлаха, эдеэлхэ, наадаха г.м. үедэнь хөөрэлдэхые оролдодог. Буряад хэлэнэй хэшээлнүүд ахалагша ба бэлэдхэлэй бүлгэмүүдтэ үдын хойно долоон хоногой хоёр дахин үнгэргэгдэдэг. Г-Х.Гунжитова, О.А.Дареева, Б.Д.Шожоевагай «Амар Мэндээ!», Д.Могоевагай «Амар сайн, үхибүүд!» гэжэ УМК хэрэглэн, дополнительная общеобразовательная программа – дополнительная программа социально-педагогической направленности, «Буряад хэлэн» возрастная категория воспитанников 5-7 лет» гэжэ программаар хүдэлнэ.

«Хүүгэд буряад хэлэндээ муу, - гэжэ багша хөөрэнэ. - Минии һанамжаар, гэртэхин хүүгэдээ түрэлхи хэлээрнь хэлэндэ оруулжа, тэдээнтэеэ ходо харилсажа байха ёһотой.

Цымжидма Дамдинцыреновна хүүгэдые түрэлхэ хэлэндэнь һургаха гэжэ арга шадалаараа оролдодог, амжалтатайшье хүдэлдэг юм. Буряад хэлэнэй фестивальда «Барбаадай» гэжэ уранаар шүлэг уншалгын конкурсдо хүмүүжэмэлнүүд эдэбхитэйгээр хабаададаг. Мүнөө үедэ хүүгэдтэ зорюулагдаһан шүлэгүүд үсөөн. Багша бэдэрэлгын ехэ ажал хэжэ, ондоо шүлэгүүдые олодог шуу. Һайшаалтайнь гэхэдэ, дүршэлтэй багша Цымжидма Дамдинцыреновна хүүгэдэй зоригтой, олон хүнэй урда гаража һурахын түлөө аалин, зориггүй хүүгэдые хабаадуулхые оролдодог. Шагай наадалгаар хүмүүжэмэлнүүдынь Ага тосхоной эрхимүүд болодог юм.

Эрхимээр хүдэлһэнэй түлөө Цымжидма Гомбоева Агын аймагай болон тойрогой Эрдэм һуралсалай хорооной грамотануудаар шагнагдаһан, баярай бэшэгүүдээр урмашуулагдаһан. 2019 ондо Эрхүү хотодо Эрдэм-һуралсалай форумдо спикерээр уригдажа, мультфильмаар мастер-класс харуулһан байна. «Региональный конкурс методических разработок на основе произведений устного народного творчества» гэһэн онлайн-конкурсын «Лучший цифровой ресурс по развитию родной речи детей дошкольного возраста на основе устного народного творчества» янзада хабаадажа, хүүгэдые «Хун шубуун» домогтой танилсуулаа. Буда Жапов ба Сарана Гомбоева гэгшэд буряад хэлэн дээрэ мультфильмын түрүүшын интернет-онлайн конкурсын эдир хабаадагшад гэжэ урмашуулагдаа һэн. Тиигээд багша Covid үбшэнэй үедэшье дистанционно һуралсалда видеоматериалнуудай, мультфильмуудай туһаар хүүгэдые буряад онтохонуудтай, домогуудтай танилсуулһан байна.

Сэсэрлиг лэ – түрэлхи хэлэнэй эхин, гуламта болоно ха юм даа. Сэсэрлигүүдтэ буряад хэлэнэй бүхы наһанай хүүгэдтэ программа зохёогдожо, үхибүүд булта түрэлхи хэлэеэ үзэхэ аргатай болохо гэжэ найдаял даа.

You have no rights to post comments