Үхэриг –буряад нютаг. Эндэ 130 хүн ажаһуудаг. Олонхинь ондоо нютагта, хото городуудаар байжа ажал хэдэг. Зүгтөө дулаан сагай ерэхэдэ, заабол нютагаа бусажа, зунайнгаа амаралта эхэ эсэгынгээ тоонтотодо үнгэргэдэг заншалтай. Тиихэдээ үри хүүгэдээ шэрэжэ асардаг. Үхэригтэ һургуули хүдэлдэггүй, гэбэшье зундаа үхибүүд олоороо сугларжа, ород хэлэн дээрэ харилсажа байдаг.
Хэлэеэ алдахадаа, арадай ёһо заншал мартагдана. Һаяхан Даши Намдаков нютагтаа соёлой комплекс байгуулха үүсхэл гаргаһан байна. Тэрэ зохёохы ажалай хужуугаар, үхибүүдые урлалда, һиилэлгэдэ, шудхалгада һургаха түсэбтэй, мүн уласхоорондын хэмжээнэй түсэбүүдые бэелүүлхэ байһанаа мэдүүлээ. Тиигэжэ Ага нютагһаа буряад хэлэнэй багшые урижа, энэ ажалайнгаа түрүүшын алхам хэбэ гээшэ.
«Июниин 18-да Үхэриг нютаг ерэжэ, үхибүүдтэ яагаад түрэлхи хэлэн дээрэ мэндэшэлхэб, танилсахаб, угаа тоолохоб гэхэ мэтые заанаб. Багашуул тоо тооложо, амитадай, шубуудай, ургамалай нэрэнүүдые хэлэжэ һурана, магтаал,үльгэр, домог хөөрэжэ үгэнэб, арадайнгаа түүхэтэй танилсуулнаб», - гэжэ Гоохон Цыренжапова хэлээ һэн.
