Ага тосхоной хоёрдохи дунда һургуули ямаршье сагта бэлигтэй багшанараараа, бэрхэ һурагшадаараа хододоо омогорхон ябадаг юм. Мянган гаран һурагшадтай тус һургуули дүшэ гаран хүбүүд, басагад байгша ондо түгэсхэжэ, ажабайдалай үргэн харгыда гаража байна. Тодорхойлходо, 11-дэхи «б» анги 15 һурагшад дүүргэбэ. Тэдэнэй нэгэн Злата Комогорцева дунда һургуулияа алтан медальтайгаар дүүргэжэ байна. Эдэ үхибүүдэй ангиин хүтэлбэрилэгшэ ябаһан Вера Александровна Китаевагай хэлэһээр, һургуули дүүргэгшэд алишье талаар урагшаа һанаатай, эрмэлзэлтэй, шуран солбон юм, номдоо бэрхэ һурагшад холын харгыда гарахаяа бэлдэнэ. Дунда мэргэжэл баталһан аттестадуудаа абанги. Һурагшад болон түрэлхид энэ үдэрые, хэзээшье, ехээр хүлеэгээ ёһотой. Һуралсалай жэлэй һүүлшын хоёр һара ехэл хүлгөөтэйгөөр үнгэрөө. Коронавирус үбшэнэй һүжэрһэн ушарһаа үхибүүд һургуулидаа ябангүй, гэртээ номоо үзөө. Дистанционно һуралсалай эрхэ байдалда багшанар ба үхибүүд холбоо барисаагаа алдаагүй. Һургуули дүүргэжэ байһан һурагшад мэдэсэ абаха гэжэ ехэ оролдожо һураа. Шэнэ түхэлэй һуралсалда үхибүүд голхоронгүй, хоёр һарын туршада багшанартаяа нягта харилсаатай байжа, үгтэһэн даабаринуудые дүүрэн дүүргэдэг байгаа. Гэртээ һуухадаа, багшын хиналтаһаа холодообди гэнгүй, бэеэ һула табингүй, урдаа табиһан зорилгонуудаа дүүрэн бэелүүлээ.
Оршон сагта залуушуул гүрэнэй шалгалтануудые барижа байна.
«Хүүгэднай хаанашье ябахадаа, урагшатай байхань дамжаггүй. Һургуулияа дүүргэжэ байхада, хүнэй сэдьхэлдэ баяртайшье, гунигтайшье мэдэрэл түрэдэг. Үхибүүн наһантнай арадатнай үлэбэ, харин урдатнай ерээдүйн мэргэжэл шэлэхэ харюусалгатай хэрэг тобойгоод байна. Хүн бүхэнииетнай гүнзэгы эрдэм мэдэсэтэй болгожо табиха, хүнэй зэргээр хүмүүжүүлхэ гэжэ багшанартнай бүхыгөөрөө оролдоо. Үндэр амжалтануудые туйлажа, һайн ябыт даа. Гүрэнэй шалгалтада 100 балл абахыетнай хүсэнэбди. Һургуули дүүргэжэ байһан таанадай дунда номдоо эрхимээр һураһанай түлөө медальнуудые абаха зон бии. Энэ һургуулиин бэлигтэй багшанар таанадта амаргүй hайн эрдэм олгуулаа, hайнаар хүмүүжүүлээ, тэрэнь бүхы наһандатнай бата үндэһэ һуури боложо байха гэжэ һананабди», - гэжэ гэртэхин үхибүүдтээ үреэнэ.
Үхибүүд арбан нэгэн жэл эндэ һуража гараһандаа ехэ баяртайнууд. Эдэ жэлнүүдтэ тэдэ булта аха дүүнэр шэнги болоһон. Саашадаа түрэл һургуулияа ходо һанажа, нэрэ солыень дээрэ үргэжэ, суурхуулжа ябахаяа тэдэ найдуулна. Энэ болбол эдир эрхэтэдэй нангин уялга гээшэ. Арбаад жэлэй саана һургуулиин богоһо алхажа ороһон багашуул «А», «Б» үзэг мэдэхэгүй ерээ һэн. Мүнөө бүдүүн зон болонхойнууд. Һургуули дүүргэгшэд тойрогой томо, түрүү һургуулинуудай нэгэн Агын 2-дохи һургуули дүүргэһэндээ омогорхолтойнууд байна гээшэ. Юундэб гэхэдэ, Агын 2-дохи дунда һургуули хизаар соогоо мэдээжэ болонхой. Эрдэм һуралсалай талаар эрхим дүнгүүдые харуулжа, гурбан жэлэй саада тээ, 2017 ондо «Хүдөөгэй эрхим һургуули» гэһэн Бүхэроссиин конкурсдо лауреат болоһон байна. Һургуулиин захирал Лариса Гонгорова «Бэлигтэй хүтэлбэрилэгшэ» гэһэн нэрэ зэргэдэ хүртөө һэн. Шабинарынь ОГЭ ба ЕГЭ-гэй шалгалтануудые тушаалгаар дээгүүр дүнгүүдые харуулжа, гүрэнэй дээдэ һургуулинуудай оюутад боложо ородог. Мүнөөдэрэй хараагаар шабинарай туйлаhан дүнгүүд хадаа тойрогой эрдэм һуралсалай ба мүн һургуулиин доторхи hуралсалай бата бэхи байдал гэршэлнэ. Эрдэм hуралсалда тойрогой засаг зургаанай хүтэлбэриин онсо анхарал хандуулдагынь мэдээжэ. Ямар байдалтай hургуулида hуранаб, хэды шэнээн эрдэм мэдэсэ hурагшада олгуулагданаб, ямар хүмүүжэл абанаб, тэрээнhээл хүн бүхэнэй ерээдүйн ажаhуудал дулдыдана ха юм.
Гэртэхин, мүн выпускнигууд арбан нэгэн жэлэй хугасаа соо ном заалгаһан багшанартаа ехэ баяртайнууд байна. Тэдэнэр заалгаһан багшанараа нэрлэхэ хүсэлтэй. Хэд бэ гэбэл, Р.П.Базарова (хими), Б.Б.Батоцыренова (түүхэ), О.В.Бекетова (биологи), М.Б.Даржаина (хари хэлэн), С.Д.Дондоков (географи), Ц.Ц.Дылгырова (тоо бодолго), Л.В.Дондокова (түүхэ), Ж.Ж.Жабэ (физикэ), Б.Б.Жигжитова (физикэ), Ц.Г.Найданова (тоо бодолго), Т.М.Сампилова (хари хэлэн), Г.Б.Холодова (ИКТ), Д.Ж.Цы-денов (физикэ), Б.Д.Цыды-пов (тамир), Б.Б.Цыренова (буряад хэлэн), В.О.Будаев (ОБЖ), А.П.Олзоев (экономико), Б.Р.Бальжинимаева (ород хэлэн ба литература), С.Ц.Цыбенова (биологи), Ц.Д.Дымбрылова (хими), Н.Н.Насанов (технологи), Б.Ц.Чимитова (психологи), Б.Б.Нимаев (тамир) ба бусад болоно.
