Хэдэн жэлэй саана дунда hургуулинууд шанартай, түргэн хүдэлдэг оптоволоконно хэлхеэ холбоотой болоһон байна. Һургуули бүхэн өөрын сайттай. Жэшээлэн хэлэхэдэ, Агын аймагай Согто-Хангилай дунда һургуулида үхибүүдэй шанартай hуралсал гараха, юумэ ойлгожо абаха хэрэгтэ бүхы түхеэрэлтэнүүд бии. Тодорхойлходо, интерактивна самбар, компьютер, мультимедийнэ кабинет, уншагшадай танхимтай номой сан г.м. болоно. Тус һургуулиин директор Цырендаши Гунгаевай хэлэһээр, жэлhээ жэлдэ нютагай захиргаан, hургуули дүүргэгшэд, гэртэхин hургуулияа заhабарилжа, шэнэ түхеэрэлтэнүүдые абажа үгэдэг hайхан заншалтай.
Һургуулида үдэр бүриин хэшээлнүүдhээ гадуур уран hайханай кружогууд, секцинүүд эмхидхэгдэдэг гуримтай. Эдиршүүл иишээ ябажа, ханын газетэ зохёожо, зүжэг табижа, дуу дуулажа һурадаг болон бусад шадабаринуудтай болодог. Багшанар ургажа ябаhан үетэнэй бэеын энхэ элүүртэ, бэхижүүлгэдэ анхарал хандуулжа, тамирай хэшээлнүүдые аша үрэтэйгөөр үнгэргэдэг. Сэбэр агаарта тамирай элдэб янзануудаар мүрысөөнүүдые эмхидхэхые оролдодог шуу. Эдэ хэшээлнүүдhээ үхибүүд хүсэ шадалтай, бэеын тэнхээ тамиртай болоно. Согто-Хангилай дунда һургуулиин багшанар hурагшадта шанар hайтай эрдэм мэдэсэ олгохо гэжэ ехэ ажал ябуулдаг шуу.
Ц.Гунгаевай хэлэһээр, хүдөө нютагуудай hургуулинуудаар хүүгэд үсөөн болоно. Һургуули хадаа хүдөө hууринай хүгжэлтэ хангадаг, hургуулиин үгы болобол, hуурин үгы болохо. Һургуулидаа канализаци татажа, дулаан туаледтэй болоһон байна. Мүнөө зундаа Согто-Хангилай дунда һургуулида хоёр долоон хоногой туршада тоо бодолгын, информатикын, экономикын, ухаан бодол хүгжөөлгын шэглэлтэй лагерь хүдэлһэн байна. Тус һургуулиин багшанар үхибүүдэй ухаан бодол хүгжөөхэһөө гадуур хүдөө ажахын талаар эрдэм мэдэсыень үргэдхэхэ хэшээлнүүдые ябуулаа. Эндэ «Согто-Хангил» ажахын түрүүлэгшэ Зоригто Дондоков, «Түншэ» гэһэн нээмэл бүлгэмэй директор Баир Дондоков, «Руно» эмхиин директор Бадмажаб Батоев гэгшэд уригдажа, үхибүүдтэ ажал тушаагаа хөөрэжэ үгөө. Багашуул эдэ секцинүүдтэ һонирхон ябажа, ажалай түрүүшын дүршэл абаа. Һургуулиин директор Цырендаши Баяровичай мэдүүлһээр, 3D-принтер, квадрокоптер, велошлем, нюдэнэй шэл, программануудтай хүдэлхэ ноутбук гэхэ мэтэ мүнөөнэй хэрэгсэлнүүд абтахаар түсэблэгдэнэ. Тиихэдэнь үхибүүд эдэ хэрэгсэлнүүдые һуралсалдаа нэбтэрүүлхэ аргатай болохо.
Үхибүүдэй эрдэм мэдэсын шанар дээшэлүүл-хэ арга боломжонууд Согто-Хангилай дунда һургуулида дүүрэн бэелүүлэгдэнэ гэжэ лаб ойлгохоор.
