Газаа үүдэнһээ эхилжэ, сэсэг намаагаар бүрхөөгдэһэн, досоогоошье сэбэр, тааруу зохидоор шэмэглэгдэнхэй «Теремок» хүүгэдэй сэсэрлиг Агын Буряадай тойрогой томо, эрхим сэсэрлигүүдэй нэгэн болодог юм. «Теремок» сэсэрлигые даагшаар 20 гаран жэлэй туршада Цыжигма Батомункуева хүдэлнэ.
Энэ сэсэрлигэй 8 бүлэгтэ, тэдэнэй тоодо адаптивна бүлэгтэ, хамта 179 хүүгэд ябадаг юм. Үхибүүдые 18 хүн – сэсэрлигые даагша, 10 хүмүүжүүлэгшэд, логопед, нэмэлтэ һуралсалай 2 багшанар, физическэ талаар бэлэдхэлэй инструктор, хүгжэмэй 2 багшанар, методист гэгшэд хүмүүжүүлдэг. «Теремок» сэсэрлиг В.Загвоздкиной ба Е.Федосеевагай «Вдохновение» программаар хүдэлдэг. Сэсэрлиг 2 корпустой, 1-дэнь – бага наһанай 3 бүлэг, 2-дохи соонь – дунда ба ахалагша, бэлэдхэлэй – 2, адаптивна бүлгэмүүдэй хүмүүжэмэлнүүд ябадаг байна. Тус сэсэрлигтэ хүүгэдэй алиш талаар хүгжэхэ бүхы эрхэ нүхэсэл бии. Үглөөгүүр суглархадаа, хүүгэд жэлэй ямар хаһа, уларил бэ, хэды хүүгэд ерээб, бүлэг соо хэды хүбүүд, басагад бэ г.м. һонинуудаараа хубаалдадаг. Сэсэрлигтэ эдэбхиин (центр активности) – урлалай, эрдэмэй ба байгаалиин, уран зохёолой, зохёон бүтээлгын, драматизациин, нютаг байгаали шэнжэлэлгын, хүгжөөлгын наадануудай 7 түб хүдэлдэг. Үхибүүн бүхэн ямар ажал хэхэеэ шэлэжэ, түбүүдээр тарадаг, түб бүхэндэ 5-6 үхибүүд болодог. Үдын урда тээ хүүгэд һуралсалда ябадаг. Үдын хойно 4 янза: робототехникын, мүнгэн һангай азбука, шатар болон буряад хэлэнэй кружогууд үнгэргэгдэдэг. Гадна логопед хүн бүхэнтэй болон бүлэг үхибүүдтэй хүдэлдэг юм. Долоон хоногой хоёр дахин жэл хахадтай болотор 9 хүүгэд адаптивна бүлэгтэ өөр өөрын сагта ерэдэг. Хүмүүжүүлэгшэ, хүгжэмшэн болон физическэ бэлэдхэлэй инструктор үхибүүдые 10 минутын туршада наадангаа юумэндэ һургадаг байна. Гадна багшанар үдын хойно А.Ивановагай «Мир, в котором я живу» болон «Развитие познавательной активности детей дошкольного возраста в экспериментальной деятельности» парциальна программануудаар хэшээлнүүдые үнгэргэдэг байна.
Хандажаб Батожаповна хүмүүжүүлэгшэдтэ туһалжа, ажалыень шэглүүлжэ байдаг юм. Шэнэ хүмүүжүүлэгшэдэ методическа заабаринуудые үгэхэ, тэдэниие ба багшанарые ажалдань хасардуулха (сопровождать) г.м. зорилготой.
Хүмүүжүүлэгшэтэй танилсуулхада иимэ: 1984 ондо Хүһөөшэ нютагай Батожап Нимаевай бүлэдэ түрэһэн. Тоонто нютагайнгаа дунда һургуули дүүргээд, Могойто тосхондо ВСГТУ-гай филиалда компьютер шудалхаяа ороо һэн. Удаань нютагайнгаа «Огонёк» хүүгэдэй сэсэрлигтэ 2004 онһоо хүдэлжэ эхилээ. Хүдэлхэ үедөө Шэтын багшанарай колледж түгэсхэжэ, мүнөө Үбэр Байгалай хизаарай гүрэнэй университедтэ хүмүүжүүлэгшын мэргэжэлдэ һурана.
«Би хүүгэдтэ, ажалдаа дуратайб. Арбан зургаан жэл хүүгэдтэй хүдэлжэ, энэл наһанаймни хэрэг гэжэ ойлгоо һэм. Хүмүүжүүлэгшэдтэшье хүүгэдтэ дуратай байха хэрэгтэй гэжэ хэлэжэ байдагби.
Арбан зургаан жэлэй саанахи ба мүнөөнэй хүүгэд ямар илгаатайб гэхэдэ, хэзээшье ондоотой. Мүнөө үеын үхибүүд эдэбхитэй, цифровой хэрэгсэлнүүдые шудалхадаа бэрхэ, юумэ мэдэхые оролдодог, бүхы талаар хүгжэнги юм. Тиигээд энэл гаджедуудые үлүү ехээр хэрэглэлгын хойшолон юм гү, хүүгэд дуугархадаа муу болоһон. Хүүгэдтэй ходо харилсажа байха хэрэгтэй. Энэ талаар гэртэхинтэйнь ажал хэгдэдэг», - гэжэ ахалагша методист хөөрэнэ.
Олон жэл хүдэлжэ, дүршэлтэй болоһон Хандажаб Зодбоевагай амжалтануудта тогтобол, тэрэ 1-дэхи категориин мэргэжэлтэн, Могойтын аймагай захиргаанай Эрдэм һуралсалай хорооной зүгһөө «Воспитатель года-2015» гэһэн аймагай конкурсын очно шатада амжалтатай хабаадаһанай түлөө хүндэлэлэй грамотаар, хүүгэдые һайнаар хүмүүжүүлһэнэй түлөө Могойтын аймагай захиргаанай грамотаар, 2015 ондо «Итоги и перспективы введения ФГОС общего образования» гэһэн орон нютагай эрдэм-шэнжэлэлгын конференциин «Инновационные практики деятельности дошкольных образовательных учреждений» гэһэн танилсуулгын талмайда хабаадаһанай түлөө Үбэр Байгалай хизаарай Һуралсал хүгжөөлгын институдай дипломоор болон баярай бэшэгүүдээр шагнагдаһан юм.
Алдар ба Хандажаб Зодбоевтоной бүлэ 3 хүүгэдые үндылгэнэ.
Залуу багшын саашадаа үшөөшье амжалтатайгаар хүдэлжэ, олон хүүгэдые эрхимээр хүмүүжүүлхэнь лабтай.
