● Тойрогой хэмжээндэ үнгэргэгдэһэн уран һайханай харалга-мүрысөөнһөө тэмдэглэл
Гал улаан тахяа жэлэй март hарада Агын Буряадай тойрогто һурагшадай уран hайханай «Оюун бэлигээ - Ага нютагтаа» гэhэн харалга-мүрысөөн үргэн дэлисэтэйгээр үнгэргэгдэhэн байна. Түрүүн гурбан аймагай түбүүд дээрэ муниципальна хэмжээнэй фестивальда 49 дунда һургуулиин талаан бэлигтэн хабаадаа. Һүүлээрнь мартын 23-да Могойто ба Дулдарга һуурингуудта, мартын 24-дэ Ага тосхондо тойрогой уран һайханай харалганууд боложо, дүн хамта мянга гаран һурагшад тайзан дээрэ гаража, концерт-наадаараа нютагайхидаа баясуулаа бшуу.
МОГОЙТЫН БА ДУЛДАРГЫН АЙМАГУУДТА
Бидэ мартын 23-да Могойтын ба Дулдаргын аймагуудай уран hайханай лауреадуудай ба дипломантнуудай концерт-наадануудые хужарлан хараа бэлэйбди. Могойтынхид харалгаяа аймагайнгаа байгуулагдаһаар 75 жэлэй ойдо зорюулаа юм. Шанда хүртэгшэдһөө гадуур хальмаг хатар гүйсэдхэһэн Хара-Шэбэрэй Сокто Прохоров, ород арадай «Иван да Марья» хатар харуулһан Догойн хөөрхэн багашуул, гимнастика хэһэн Могойтын 1-дэхи ба 2-дохи, мүн Ага-Хангилай дунда һургуулинуудай уян нугархай басагад, ород арадай хатар гүйсэдхэгшэ Могойтын 2-дохи дунда һургуулиин һурагшад олондо һайшаагдаһан байна. «Аймагай 75 жэлдэ тон үсөөн - 54 үхибүүдтэй Наринай Адагай һургуулиһаа эхилээд, эгээл олон - 1006 һурагшадтай Могойтын 2-дохи дунда һургуули хүрэтэр дүн хамта 17 һургуули харалгын бүхы янзануудта хабаадаа. Тойрогой харалгада амжалта туйлажа, олон лауреадуудтай болоһондоо баяртайбди. Бүгэдэ зондо, багшанарта, гэртэхиндэ, наһатайшуулда, холо нютагта байһан һургуули дүүргэгшэдтэ туһаламжа үзүүлһэнэйнь түлөө баярые хүргэнэбди», - гэжэ Могойтын аймагай захиргаанай һуралсалай ба залуушуулай политикын хүтэлбэриин дарга Наталья Батоцыренова хэлээ һэн.
"Венок дружбы" ёохор гүйсэдхэгшэ Могойтын аймагайхид.
Дулдаргын аймагай концерт-наадан арадай гэгээрэлэй дабшахы зам харуулһан, түүхын баян баримтануудтай, удхатай кинофильмаар эхилээ. Һурагшад тогтон торонгүй, нэгэ амин доро сог залитайгаар хатараа, дуулалдаа. Абьяас бэлигтэй үхибүүдые харахадаа урмашахаар байгаал даа. Дулдаргынхид хонгёо һайхан хоолойтой дуушадтай байна. Хатарай хүгжэм доро «Подай балалайку» хатар харуулһан Дулдаргын 2-дохи дунда һургуулиин үхибүүд, «Статуэтка» хатар хатарһан Үзөөнэй дунда һургуулиин 11-дэхи ангиин һурагша Милена Моритуева, «Так будет всегда!» гэһэн дуу дуулаһан Даниил Полетаев ба бэшэн аймагай уран һайханай харалгын дипломантнууд байгаа…
АГЫН АЙМАГТА БА ТОСХОНДО
Агын аймагай, Ага тосхоной нэгэдэмэл концертнүүд Амидхаашын, Агын нэгэдэхи дунда һургуулинуудай һурагшадай бэлдэһэн «Бабжа-Барас баатар», «Үльгэрэй орон» гэһэн хатарнуудаар эхилээ һэн. Аймагай, тосхоной али алишье һургуулиин һурагшадай гүйсэдхэлгэ эрхим һайн байгаа.
"Үльгэрэй орон" оригинальна жанр, Агын 1-дэхи дунда һургуули.
Эдиршүүлэй талаан заха хизааргүй, тэдэниие зүбөөр шэглүүлэн, заажа харуулхадал, юушье хэхэ наһандаа ябана һэн тула ганса нэгээрээ, олоороошье хонгёогоор дуулаха, уян нугархайгаар хатарха, шударгы солбоноор ёохорлохо, элдэб урлалаар һонирхон дурадхаха бэлиг шабадаритай байһанаа гэршэлээ. Жэшээнь, Һүдэнтын дунда һургуулиин Сарюна Аюшиевагай элһээр зураһан «Мой край» гэһэн зураг һайшаамаар. Юуб гэхэдэ, Сарюна добохон, сэсэгүүдые, модоной набшаһатай эшэ, агаарта жэргэжэ байһан шубуудые, урдаһан гол зурана. Тиигэжэ байтараа, урдаһан голые 2 хун шубуудтай нуур болгожорхино, агаарта жэргэжэ байһан шубуудай, модоной эшын орондо газаагаа сэргэтэй һэеы гэр, тэрэнэй наана дэгэл үмдэһэн, үхибүү гарһаань хүтэлһэн эхэнэр бии болошоно. Дуу хатараар хэнэйнь гүйсэдхэлгэ һайн, муу байгааб гэжэ хэлэхэнь бэрхэтэй – бүхы хабаадагшад гоёор дуулана, хатарна. Саашадаа соёлой шэглэлээр дабшаха һаань, зарим нэгэндэнь ехэ дүй дүршэл, ѳѳрыгѳѳ туршалга болоно. Тиимэһээ фестивалиин хүүгэдэй оюун бэлиг хүгжѳѳхэ, тэдэнэй аза талаанииень элирүүлхэ зорилго хүсэд дүүрэнээр бэелүүлэгдэнэ. «Эбтэй уладууд эрьеын арһанда багтаха» гэдэгтэл, Агын тойрогой үбэр соохоно олон үндэһэ яһатан эб нэгэтэйгээр багтан ажаһуудаг шуу.
ЖЮРИИН ГЭШҮҮДЭЙ ҺАНАМЖАНУУД
Надежда ШМАКОВА, Шэтын «Огоньки» гэһэн хүүгэдэй жэшээтэ бүлгэмэй хүтэлбэрилэгшэ:
- Ямар гоё һайхан һайндэртэ байба гээшэбиб?! Дуу дуулаха, хатарха, хэмжээ ябуулга хүтэлэн ябуулха… – элдэб талаан бэлигтэй хүүгэд олон лэ байнал даа. Эдэ бүгэдэ – нэгэл концерт соо! Арга боломжын бии һаа, бидэнһээ холо, хүдѳѳ газарта байдаг талаан бэлигтэй хүүгэд яажа хүдэлнэб гэжэ Шэтынгээ бүлгэмдэ харуулхын тула энэ фестиваль буулгаһан диск эрихэ һэм. Шэтэдэ «Гуранёнок» фестиваль үнгэрѳѳ бэлэй. Энэ фестивальда Амидхаашын һургуулиин хүүгэдэй коллектив хабаадажа, гран-при абаа бэлэй. Мүнѳѳдэр тэдэ хүүгэдые, дурадхаһан номерыень хоёрдохёо хараха аза талаантай байһандаа баяртайб. Сэсэглэжэ байһан гайхамшагта һайхан орондо орошоһон шэнгил даа. Ѳѳртѳѳ ехэ дүй дүршэл абабаб.
Дэлгэрэнгыгээр 13-дахи дугаарта.
