Тээсгэн Ононой аймаг ошоходоо, Доодо Саһашын һургуули хүрэһэн байнабди. Энэ һургуули аймаг дотороо һуралсалай эгээл томо гуламта юм.

 

ҺУРАГШАД ОЛОН

Үнэхѳѳрѳѳ, Доодо Саһашын хоёр дабхартай һургуули Ононой аймаг дотороо эгээл томо, олон һурагшадые һургадаг ба бүхы һургуулинуудай һурагшадай гүрэнэй шалгалта тушааха ори ганса пункт юм. Дүрбэдэхи жэлээ директорээрнь хүдэлжэ байһан Баирма Болотовна Жалсановагай хэлэһээр, тус һургуулида аяар 450 гаран һурагшад ябана. Тэдэ нэгэ сменэдэ багтадаггүй. Эхин шатын гурбан анги – үдэһѳѳ хойшо, шалгалта тушааха 4-дэхи ба бэшэ ангинуудай һурагшад үглѳѳнһѳѳ һурана. Мүнѳѳ жэл 14 һурагшад түрэл һургуулияа түгэсхэжэ, ажабайдалай үргэн замда гарахаяа бэлдэнэ. Һуралсалай талаар директорэй орлогшо Антонина Кирилловна Поповагай хѳѳрэһѳѳр, эхин шатын һургуули шатаһан байжа, бага наһанай һурагшад 1-дэхи дабхарта номоо үзэдэг.

Һурагшад шатарай кружогто, волейбол, баскетбол г.м. тамирай секцинүүдтэ ябаха аргатай. Гадна технологиин хэшээлдэ оёдол хэжэ, яармагта бүтээлнүүдээ дэлгээдэг.

Ондоо нютагуудһаа, Агын тойрогһоошье элдэб һалбарида ажаллахаяа гэр бүлѳѳрѳѳ ерэһэн залуушуулай хүүгэд тус һургуулида орожо, буряад хүүгэд яһала олон болоо. «Һургуулидамнай буряад хэлэн үзэгдэдэггүй. Буряад һурагшадай олохон болоһон дээрэһээ тэдэнэй ёһо заншал, соёлоо мэдэжэ ябахынь тула ябан ошон эндэ «Буряад соёл» гэһэн факультатив байгуулха һанаатайб», - гэжэ Баирма Болотовна мэдүүлбэ.

 

 

ХҮМҮҮЖЭЛЭЙ ҮНДЭҺЭН

 

Доодо Саһашын дунда һургуулида хүүгэдэй хүмүүжэлдэ ехэ анхарал хандуулагдадаг. Урдань октябрята, пионернүүд, комсомол залуушуулые хүмүүжүүлхы гурим журамтай һаа, мүнѳѳ үедэ Россиин Президент В.Путинай тогтооһон «О создании Общероссийской общественно-государственной детско-юношеской организации «Российское движение школьников» зарлигта, мүн Россиин оборонын министр С.Шойгугай үүсхэлээр байгуулагдаһан «Юнармия» гэһэн сэрэгэй-патриотическа хүдэлѳѳндэ анхарал хандуулагдана. Тиимэһээ хоёр жэлэй саада тээ, 2015 ондо, Доодо Саһашын дунда һургуулида хасаг-кадедүүдэй ба нёдондо тамирай-хамгаалалгын классууд нээгдээ. Хасаг-кадедүүдэй классай һурагшад мүнѳѳ 8-дахиин, тамирай-хамгаалалгын классай һурагшад 7-дохи ангиин болоод ябана. Хасаг-кадедүүдэй класста «Рукопашный бой», «Хасагуудай соёл» гэһэн факультативууд ябуулагдадаг. «Хасаг-кадедүүдэй класснай хизаарай хэмжээнэй хасаг залуушуулай слёдто эдэбхитэйгээр хабаададаг болонхой. Хабаадахадаа, заабол ямар нэгэн шагналтай бусадаг. Классайнь хүтэлбэрилэгшэ, Светлана Владимировна Обухова, үдэр бүри хэшээлнүүдэй һүүлээр һурагшадаа суглуулжа, ямараар үдэрѳѳ үнгэргѳѳб, юун хэгдээб гэжэ һонирходог», - гэжэ А.Попова хѳѳрэбэ.

 

Дэлгэрэнгыгээр 15ахи дугаарта.

You have no rights to post comments