Августын 24-30-ай үдэрнүүдтэ Агын Буряадай тойрогто августын зүблөөнүүд үнгэргэгдөө.
Агын Буряадай тойрогой Захиргаанай социальна һалбариин хүтэлбэриин дарга Билигма Будаевагай тэмдэглэһээр, федеральна бюджедэй болон Алас Дурнада түлэблэлнүүдые бэелүүлгын туһаар 3 жэлэй туршада тойрогой дэбисхэр дээрэ 3 миллиард түхэригэй хэмжээ ябуулганууд үнгэргэгдөө, тэрэ тоодо 800 сая түхэриг һуралсалай һалбарида гаргашалагдаа.
Агын тойрогой Захиргаанай социальна хүгжэлтын таһагай дарга Роза Балдоржиева элидхэл хэхэдээ, «Образование» гэжэ үндэһэн түлэблэл бэелүүлгын эрхэ нүхэсэлдэ Агын тойрогой һуралсалай һалбари холын хараатайгаар хүгжөөхэнь шухала гэжэ тэмдэглээ.
ЕГЭ-гэй дүнгүүдые шэнжэлхэдэ, дээдэ баллнуудай тогтонижонги байһые харуулна. Бүхыдөө нёдондоной дүнгүүдтэй сасуулхада, 81 ба тэрээнһээ дээшэ баллнууд 25 хубяар дээшэлээ (82 ажал – 2020 ондо, 88 – 2021 ондо, 110 – 2022 ондо). Дээдэ дүнгүүдые ганса тосхонуудай бэшэ, харин хүдөө һуурингуудай һургуули дүүргэгшэд харуулна.
Уласхоорондын эрдэмэй ба дүршэл абалгын «Шаг в будущее» конференциин дүнгүүд тойрогой һурагшадай арга боломжын дээшэлһые харуулна. Региональна шатада Үбэр Байгалай хизаарай һурагшадай эрдэм шэнжэлэлгын болон түлэблэлнүүдэй 75 ажал шэлэгдэһэн байна, тэдэнэй 51-эйнь авторнууд – Агын Буряадай тойрогой һурагшад.
Федеральна экспертизын дүнгүүдээр, Агын залуу шэнжэлэгшэдэй 21 ажал илаһан, шангай һууринуудта гараһан байна.
2022 оной «Шаг в будущее» форум Европын 12 гүрэнэй, Америкын, Азиин 1008 гаран эрхим һурагшад-шэнжэлэгшэдые ба эхин курснуудай оюутадые суглуулаа. Инженернэ, естественно-научна ба социально-гуманитарна шэглэлнүүдээр шэнжэлэлгэ харуулаа.
Ерэхэ жэл багшын ба хүмүүжүүлэгшын жэлдэ зорюулагдаһан хэмжээ ябуулгануудта, гадна «Школы Минпросвещения России» түлэблэлдэ анхаралаа хандуулха тухай Роза Балдоржиева тэмдэглээ.
Байгша оной сентябриин 1-һээ «Школы Минпросвещения России» гэһэн түлэблэл бэелүүлгын туршалга Агын тойрогой 3 һууринда – Һүдэнтын, Будаланай болон Тугшанай һургуулинуудта эхилхэ.
Нордоп БАБУЕВА.
