Дулдарга һууринай «Чебурашка» гэһэн хүүгэдэй сэсэрлигтэ залгалаа байшан баригдажа, сентябриин 1-эй үдэр баяр ёһололой оршон байдалда нээлгэнь эмхидхэгдэһэн байна.
Залгалаа байшанай нээлгэ багашуул, гэртэхин тон ехээр хүлеэгээ ёһотой. Шэнэ байшанда 1,5-3 наһатай 36 үхибүүд ябажа эхилбэ. Газаа досоогүй һаруул гоё үнгэтэй мүнөө үеын байшан соо хүүгэд обтой хүхюутэйгээр наададаг болохонь гээшэ.
Тус байшанай барилга «Развитие образования Забайкальского края по направлению созданий дополнительных мест для детей в возрасте до 3-х лет в организациях, осуществляющих образовательную деятельность по образовательным программам дошкольного образования» гэһэн федеральна түлэблэлэй шугамаар ябуулагдаа. Һуралсалай шэнэ объект хэрэгтэй бүхы түхеэрэлтэнүүдээр хангагданхай, тэрэ тоодо бараан, наадхуурнууд, һуралсалай хэрэгсэлнүүд бии. Тиихэдэ байшанай оршон тойронхи газар дэбисхэр баhал һайжаруулагдаа – һарабшатай һандалинууд баригдаа, дүүжэн табигдаа, үхибүүдэй наадаха ба элһэн талмайнууд зохёогдоһон байна.
Нээлгын үедэ хүүгэдэй сэсэрлигэй хүмүүжэмэлнүүд концерт-наада табяа бшуу. Дулдаргын аймагай захиргаанай толгойлогшо Базар Дугаржапов «Чебурашка» хүүгэдэй сэсэрлигые даагша Екатерина Пахомовада шэнэ байшанай түлхюур барюулаа.
Цымжидма ДОЛГОРОВА.
