- Баира Сергеевна, Агын Буряадай тойрог үнинэй ерэхэ гэжэ шиидээ гүт?
- Бидэ Үбэр Байгалай хизаарай Агын социальна һалбариин ажалтадай мэргэжэл дээшэлүүлгын институдай хүдэлмэрилэгшэдтэй үнинэй нүхэсэдэгбди. Үбэл суг семинар үнгэргэхэ, хэдэн шатаар хүдэлхэ гэжэ шиидээ һэмди. Нэгэдэхи шатада бидэ Агын тойрог ерээбди. Хоёрдохи шатада буряад хэлэнэй багшанар Хальмаг Улас ошохо түсэбтэй. Гол зорилгомнай хадаа түрэл хэлэеэ – буряад ба хальмаг хэлэнүүдые хүгжөөлгэ, дүршэл шадабаряараа хубаалдалга, шэнэ онол аргануудые нэбтэрүүлгэ, түрэл хэлэеэ дэлгэрүүлгэ болоно. Манай багшанар хэшээлнүүдые үнгэргөө, мастер-классуудые харуулаа, буряад хэлэнэй багшанар сэгнэшэгүй дүршэлөөрөө хубаалдаа.
- Үшөө ямар нютаг можоор ябаһамта?
- Чечен Улас ошожо, семинар үнгэргөө һэмди. Чечен хэлэн манай хэлэнһээ холо ондоо байна. Буряад Уласай буряад хэлэнэй багшанартай уулзажа, дүй дүршэл абажа, дүршэлөөрөө хубаалдаа һаа дээрэ бэшэ гү, монгол хэлэтэ түрэл арадууд ха юмбибди гэжэ багшанарнай дурадхаа һэн. Хэлэеэ алдажа байһан түрэл арадууд хамтаржа, бэе бэедээ туһалха аргатай байнабди.
Сагаан сэдьхэлһээ дуратайгаар зорижо ерээбди. Бидэ эндэһээ абаһан дүршэл шадабарияа дүүрэн хэрэглэхэбди, буряад хэлэнэй багшанарай маанадһаа абаһан дүршэл хэрэглэбэл, баһа һайн.
(Үргэлжэлэлынь 25-дахи дугаарта).
Нордоп БАБУЕВА.
