Үзөөнэй «Радуга» хүүгэдэй сэсэрлигые даагша, Россиин ниитэ һуралсалай хүндэтэ хүдэлмэрилэгшэ Дулмажаб Соктоева багашуулай буланай байдал тушаа тодорхойгоор хөөрэжэ үгөө һэн. Хүүгэдэй сэсэрлиг дүшэн жэлэй саада тээ, 1985 ондо баригдаһан байна. Совет засагай үедэ баригдаһан байшан 2023 ондо капитальна заһабарилгада ороһон юм.
   Оршон сагта хүүгэдэй сэсэрлигэй гурбан бүлэгтэ 62 багашуул ябана. Алас Дурнын федеральна тойрог дэмжэхэ «Единая президентская субсидия» программаар 33 сая гаран түхэригөөр байшан һэльбэн шэнэлэгдээ һэн. Үшөө нэмэри 7 сая түхэригэй эд бараан, хүүгэдэй эдеэ хоол баридаг, унтадаг таһалгануудта нэмэри хэрэгсэлнүүд, нааданхайнууд абтаһан байха юм. Шэнэ байшан соо үхибүүд хүмүүжэл гараад, саашадаа һуралсалаа үргэлжэлүүлжэ, эрдэм бэлигтэй эрхэтэд болодог. Үзөөнэй багашуул сэсэрлигтэ ябажа, «А» үзэгтэ һурана. Хүмүүжүүлэгшэд түрэл буряад хэлэеэ, ёhо заншалаа багашуулда дамжуулжа байдаг.
   Сэсэрлигые даагшаар дүй дүршэлтэй мэргэжэлтэн Дулмажаб Соктоевна 2000 онһоо мүнөө үе болотор амжалтатай ажаллана. Тэрэнэй хэлэһээр, тус сэсэрлигтэ багашуулай ябаха һууринууд барагсаан эзэлэгдэнхэй. Урда жэлнүүдтэ хүүгэдэй тоо, хэзээшье, олон байһан аабза. Дунда һургуулида 140 гаран үхибүүд һурана. Үзөөн нютаг Дулдарга һууринда дүтэ оршодог байжа, ажаһуугшадынь зөөжэ ошодоггүй.
   Сэсэрлигтэ ямар мэргэжэлтэд хүдэлдэг бэ гэхэдэ, 2 няня, 4 хүмүүжүүлэгшэд, хүгжэмэй багша, 2 тогоошод, кладовщик, харуулшан ба бусад. Хүмүүжүүлэгшэд – Цыцык Цыриторова, Жаргалма Аюшиева, Билигма Дондокова, Вера Цырендоржиева гэгшэд долоон хоногой табан үдэр үглөөнһөө үдэшэ болотор багашуулда хүмүүжүүлгын ажал ябуулдаг. Багшанар дээдэ, дунда тусхай мэргэжэлтэй. Сэсэрлиг хэрэгтэй эд бараагаар, номуудаар, хүгжэмэй хэрэгсэлнүүдээр гүйсэд хангагданхай. Хүүгэдэй хоол хизаарай бюджед даана. Сэсэрлигүүдые дэмжэхэ талаар гүрэнһөө жэл бүри туһаламжа үзүүлэгдэдэг гээшэ. Тэрэнэй аша туһаар сэсэрлигтээ хэрэгтэй юумэнүүдые абадаг. Үбэлдөө дулаагаар хангадаг котельни сэсэрлигтэ дүтэ оршодог шуу. Хүдөөгэй врачебнэ амбулаторидо ажалладаг эмнэлгын сестра үхибүүдэй бэе шалгадаг. Багашуулай дунда ханяадан хамшагай ехээр hүжэрбэл, сэсэрлигээ саг зуура хаадаг юм. Байгша ондо 13 хүүгэд «уурхайһаа» табигдажа, намар һургуулиин һурагшад болохо юм. Сэсэрлигэй хүмүүжэмэлнүүд Дулдаргын аймагта, тойрогто үнгэргэгдэһэн мүрысөөнүүдтэ хабаадажа, эрхимүүдэй тоодо ородог гээшэ.
   Байшан руу ороходо, үхибүүд ородоор, мүн түрэл буряад хэлэн дээрээ харилсажа, наадажа байгаа бэлэй. Таниха, танигдаашьегүй хүнэй орожо ерэхэдэ: «Мэндээ», - гэн угтажа байхадань, урматай даа. Багашуул сэсэрлигтэ ябажа, hургуулиин урда тээ hайн бэлэдхэл гарана. Хүмүүжүүлэгшэдынь багашуулда хэшээл заахадаа, алишье талаар баян мэдэсэ олгодог. Һуралсалай үедэ үргэн талмайтай сэсэрлигэй байшан соо жэл хахадтайhаа зургаа наһатай болотор багашуул хүмүүжүүлэгдэнэ. Тэдэнэртэ буряад, ород хэлэнүүдэй, тоо бодолгын, уран зурагай, дуу хүгжэмэй, хатар бүжэгэй хэшээлнүүд ябуулагдана. Дүй дүршэлтэй, шадамар бэрхэ хүмүүжүүлэгшэдэй хүтэлбэри доро үхибүүд ганса үзэг бэшэгтэ һурана бэшэ, һайн хүмүүжэл гарана гээшэ.

You have no rights to post comments