Нээлгын баяр ёһололдо Россиин Федерациин сенатор Баир Жамсуев, Агын Буряадай тойрогой Захиргаанай хүтэлбэрилэгшэ Базар Дугаржапов, Үбэр Байгалай хизаарай хуули тогтоолгын Суглаанай түрүүлэгшын нэгэдэхи орлогшо Сокто Мажиев, Ага тосхоной захиргаанай толгойлогшо Андрей Дашин, «Энергожилстрой» нээмэл бүлгэмэй генеральна захирал, подрядна эмхиин ударидагша Виктор Лопатин, «Забайкальская концессионная компания» нээмэл бүлгэмэй генеральна захирал Андрей Мельников ба Эдуард Норполовой хүгшэн аба, эжы Нима-Цырен Доржиевич ба Ким Жигжитовна Норполовтон, нагаса аба, эжы Мунко-Батор Галданович ба Шуя-Ханда Лайдаповна Цыреновтэн, мүн абга эгэшэ Цындыма Нимацыреновна Дугарова, Эдуард Норполовтой суг алба хааһан гвардиин подополковник Александр Лучай гэгшэд хабаадаа.
   32 үхибүүд шэнэ һургуулиин богоһо түрүүшынхеэ алхаба. Бага наһандаа ябаһан аляа үхибүүдэй түрүүшын багшанар Дарима Цымпилова ба Татьяна Будаева болоно.
   Үргэн, уужам һургуулиин нээлгэдэ Россиин ба Үбэр Байгалай хизаарай мүрысөөнүүдтэ хабаадажа, хэдэн дахин абарга болоһон, сүлөөтэ барилдаагаар тамирай мастерта кандидат, 9-дэхи ангиин һурагша Доржи Ширапов, «Шаг в будущее» конференцидэ хабаадагша, хэдэн олимпиадын илагша, номдоо бэрхээр һурадаг 11-дэхи ангиин Виктория Пань, бүхэроссиин олимпиадын муниципальна шатын илагша, робототехникээр фестиваль болон мүрысөөнүүдтэ хабаададаг, 11-дэхи ангиин Балдан Лхамажапов гэгшэд Россиин Федерациин, Үбэр Байгалай хизаарай, Агын Буряадай тойрогой тугуудые бодхоохо хүндэдэ хүртөө.
   «...Таанад, шэнэ, һаруул, томо һургуулитай болобот. Энэтнай – тон ехэ жаргал. Һургуули һүүлшын технологи ба түхеэрэлтэнүүдээр хангагдаатай. Энэ үдэртэ дашарамдуулан, һургуулиин багшанарые амаршалая. Һайхан байдалтай һургуулида хүдэлхэнь гээшэ. Һурган хүмүүжүүлгын ажалдатнай амжалта хүсэнэб. Һайндэрөөр бүгэдые амаршалнаб», - гэжэ Россиин Федерациин сенатор Баир Жамсуев үгэ хэлээд, Үбэр Байгалай хизаарай амбан захирагша Александр Осиповой дамжуулһан бэлэг һургуулиин захирагша Гэрэлма Бадмаевада барюулаа. «Энергожилстрой» нээмэл бүлгэмэй генеральна захирал Виктор Лопатин ба ахамад инженерэй орлогшо Валерий Речич, Агын 5-дахи дунда һургуулиин захиралай орлогшо Болот Бадмаев гэгшэд Россиин Федерациин сенаторай баярай бэшэгээр шагнагдаа.

You have no rights to post comments