Дарима басаганай хөөрэһөөр, тэрэ «Шаг в будущее» гэһэн эрдэмэй-дүршэл абалгын конференцидэ хабаадаха гэжэ шиидэһэн байна. Даримын эрдэмэй хүтэлбэрилэгшэ Соёлма Чимитова «Популяризация бурятского языка посредством стикер-паков в мессенджерах и социальных сетях» гэһэн сэдэб дурадхаа. Тиигэжэ басаган азиат шарайтай хүнүүдэй зу-рагуудые шэлэжэ суглуулаад, тэрэ зурагуудһаа нюур шарайнь түхэл һажаалган зуража, эскизүүдые тусхай программа соо хэнэ. Тиигээд iPad планшедтэ Procreate хабсаргалта соо стикернүүд болохо зурагуудые зурана. Түрүүн зурагай ашаар хүнэй шарайда үзэгдэдэг элдэб мэдэрэл харуулга дээрэ хүдэлөөд, һүүлээрнь тэрэ зурагайнгаа бэшэлгэ дээрэ һуужа эхилээ. Энэ хэрэгтэнь буряад хэлэнэй багша Сэсэгма Жанчипова туһалһан байна. Хэзээшье, түрүүшын юумэн түрүүшын, алдуу эндүүтэй байхаяа һанадаг: стикернүүдээ социальна сетьдэ оруулхадань, хүн зон бэшэлгэнь алдуутай гэжэ муурхаа, зэмэлэлтэ хэлээ. Тиихэдэнь тэрэнээ һалгаад, шэнээр заһажа, «Буряад стикернүүд 2.2» гээд гаргаһан байна. «Ямар зорилготойгоор иимэ ажал бүтээхэ гэжэ шиидээбши? Орёо байгаа гү?» гэһэн асуудалда тэрэ иигэжэ харюусана: «Зохёохы ажалда, зураг зуралгада дуратайб, тиимэһээ намда ехэ хүндэ хүшэр байгаагүй. Энэ ажалаймнай зорилго хадаа хосоржо байһан буряад хэлэеэ үзэлгэ дэлгэрүүлгэ болоно. Нүгөө талаар, буряадаар дуугардаг зоной дунда энэ ажалнай дэлгэрүүлхэ зорилготой бэшэ болошоно. Тиимэһээ тиимэ зондо таатай зохидоор харилсаха (удобное общение) арга болоһой гэһэн зорилго табигдаа. Иимэ юумэн дээрэ энээнһээ урагша хүдэлжэ үзөө-гүй байгааб, тиимэһээ намда һонин байгаа».
   Даримын саашань хөөрэһөөр тэрэ багадаашье, эхин шатын һургуулида һурахадаашье, зураг зурадаггүй байһан. Гэнтэл 8-дахи ангиин болоод, зурагаар һонирхожо, саарһан дээрэ зурадаг болоо. Гэртэхинэйнгээ планшет абажа үгэхэдэ, шэнэ оньһон хэрэгсэлдэ дүршөө. Мүнөө тэрэ зураг зуралгын ондоо дүрэ техникэдэ һураха эрмэлзэлтэй байһанаа мэдүүлнэ.

You have no rights to post comments