Эхэ оронойнгоо түлөө
нүгшэһэн минии батальоной
баатарнуудта зорюулнаб.
Наранай орохо зүг зорижо гэрһээ мордооб. Наранай орохо зүг шэглээд ябанаб. Олон һүни үргэһэ нойргүй ябахадаашье, ойро зуурахана зали абажа амархадаашье, наранай орохо зүгые бодолһоо гарганагүйб - наранай орохо зүгтэ минии дайсан.
Эсэгэмни залуу наһандаа эмниг мори һургажа, жабарта һүни адуу манажа, саһа бордоһон соогуур түлеэ залһаа шэрэжэ, үргэһэ нойргүй ажал хэжэ, үри бэеэ үндылгэхын хойноһоо ябаһан юм. Хэдэн олон мори тахалааб, хэдэн олон бухал табяаб, хэды һүри табяаб, хэды тэргэ дархалааб – эдэнэй тооень абаа хада жэгтэй юумэ байха байгаа. Теэд тэрэ хэһэн ажалаа эсэгэмни өөрөөшье мэдэхэгүй. Тэрэнэй табин жэлдэ хэһэн ажалынь саһанай хайлахада баларһан мүр мэтэ һалаа.
Би энэ танигдаагүй газарта дайсадтай тэмсэжэ ябахадаа, олон голнуудые дабажа гарааб, олон хүнтэй танилсааб, олон бэрхэшээлнүүдые үзөөб, оло дахин аюултай ушарааб – эдэ бүгэдэмни минии эсэгын ябадал мэтэ бү хосорһой гэжэ һананаб. Энэ бодолоо бэелүүлхын тулада энэ туужа бэшэнэб.
Наран ородог. Наран дахин гарахын тулада ородог. Немецүүд дарагдаха. Дахин тэдэ тархяа үндылгэхэгүй, дахин гай тодхор ушаруулхагүй. Энээнэй түлөө бидэ наранай орохо зүг тээшэ дабшанабди.
Саг ошохо. Саһан дээрэхи мүр һалаха, теэд бидэнэй илалта, байлдаанай алдар габьяата мүрнүүд хэзээ заяандаашье мартагдангүй үлэхэ. Хэн нэгэн тооһондо дарагдаһан номуудай дундаһаа энээниие оложо үзэхэдөө, бидэнэй наранай орохо зүг тээшэ ябаһыемнай һанаха...
