Кружок ная гаран жэлэй туршада эмхидхэгдэжэ, хэдэн үе эдиршүүл буряадайнгаа ёһо заншал, һургаал, эрдэм бэшэгтэ һурана. Хизаар ороноо шэнжэлэгшэ, багша ябаһан Бадма-Базар Намсараев 1938 ондо тус кружок байгуулһан. Урдын багшанарай хэлэһээр, бэлигтэй багша хүүгэдтэй хүдэлжэ, гар бэшэмэл сэтгүүл гаргадаг байhан. Багша Намсараев аяар 36 жэлэй туршада, наhанайнгаа амаралтада гаратараа, «Булаг» кружок хүтэлбэрилhэн юм. Бадма-Базар Намсараевич баян дүй дүршэлтэй багша байхаhаа гадна шүлэгшэн, талаан бэлигтэй уран зохёолшо байһан. Бэлигээ хүүгэдтэ дамжуулхаяа оролдодог байһаниинь эли бшуу. Кружок ябуулжа, олон хүниие уран зохёолдо дуратай болгоhон. Олон жэлэй хугасаа соо залуу үетэн энэ «Булагай» «аршаан дуhалhаань» хүртөө. Кружогто ябагшад нютаг ороноо шэнжэлжэ, гол горходой, ан амитадай болон элдэб ургамалай аймагуудые hайн мэдэхэ, түүхэ домогоор hонирхохо зон үндыһэн байнад.

Бэлигтэй багшын шабинарай, буряад хэлэнэй багшанарай аша оролдол-гоор кружок бүри хүгжэлтэеэ абажа, эдир гуурhатанай эхин мүрнүүдые мүлихэ, олон хүнэй зохёохы харгыень олгуулhаар зандаа. Ная гаран жэл соо кружогой хүтэлбэрилэгшөөр олон багшанар ажаллаһан юм.

Оршон сагта гуша гаран жэлэй туршада буряад хэлэ ба литературын багшаар хүдэлжэ ябаһан дээдэ шатын багша Мыдыгма Ринчиновна Балданова «Булаг» кружок ябуулна. Хизаарай мэдээжэ багша Мыдыгма Балданова шабинартаяа кружогой ажал улам эршэдүүлнэ. Хүмүүжэмэлнүүдынь буряад хэлэ бэшэгэй олимпиада, эрдэмэй-дүршэл абалгын конференци, семинарнуудта хабаадажа, хододоо түрүү зэргэдэ ябадаг.

Үхибүүд «Булаг» кружогто ябахадаа, буряад хэлэн дээрээ уранаар, тордиһогүй уншажа һурана, уран зохёолнуудые уншаад, геройнуудайнь абари зан, үйлэ ябадалнуудые, гол удхыень хөөрэжэ һурана, эхэ байгаалияа шэнжэлнэ. Һурагшад өөһэдөө бүхэли текстнүүдые зохёожо туршана.

Текстнүүдые зохёохын хажуугаар шүүмжэлжэ һурана. Багша М.Балданова кружогтоо һурагшадай һонирхол татаха наада, викторинануудые заабол эмхидхэдэг гээшэ. Тиихэдэнь һурагшад бүри шуналтайгаар буряад хэлэеэ үзэнэ бшуу. Хабарай ба намарай сагуудта багша һурагшадаа дахуулжа, хүдөө байгаали гаража, Һүдэнтынгөө нангин шүтөөнэй газарнуудтай танилсуулдаг юм. Тиихэдэнь һурагшад хизаар оронойнгоо байгаалиин нюуса баялигуудаар һонирхожо, гүнзэгыгөөр мэдэхые оролдоно. Кружок эмхидхэгдэхэдээ, үхибүүдэй хэлэ, уран һайханай талаар бэлигээ хүгжөөлгэдэ ехэ түлхисэ үгэнэ. Уран зохёолшодой рассказ, шүлэгүүдые уншахадаа, үхибүүд телефон, компьютерһаа ойр зуурашье һаа амарна. Хэнэйшье мэдэһээр, сагай эрхээр үхибүүд түрэл хэлэеэ мэдэхэгүй, ород хэлэтэй болонхой. Хүдөөдэшье иимэ байдал үзэгдэнэ. Буряадаараа яряанай хэлэн дээрэ хөөрэлдэбэшье, уншаха бэшэхэнь хүндэ.
Һүдэнтын һурагшад тойрогойнгоо эхэ хэлэтэ «Толон» һониндо зохёолнуудаа толилуулдаг юм. Олон хүбүүд, басагад хурса гуурhатай болоһон. Шүлэг бэшэхэдээ, найруулга зохёоходоо, арадай аман үгын баялиг хэрэглэжэ, уранаар бэшэдэг. Ёhо заншал, байгаали, ан амитадай аймаг тухай богонихон рассказуудые зохёодог.

«Булаг» кружогой шабинар дунда һургуулияа дүүргээд, буряад хэлэ шудалхаяа Эрхүүгэй, Буряад ороной дээдэ һургуулинуудта оюутад боложо ородог. Олон шабинарынь багшанар болонхой, тойрогой, Буряад ороной олондо мэдээсэл тараадаг хэрэгсэлнүүдтэ, дунда һургуулинуудта, сэсэрлигтэ ажалладаг. Бүгэдэ буряадай «Алтаргана» фестивалиин лауреадууд, дипломантнууд болоһон. Марина Санжаева, Наталья Цыдыпова, Димит Аюрова ба бусад «Булагай» эрхим шабинар болодог. Энэ жэл Гырылма Жигдылмеева Буряадай гүрэнэй багшанарай дээдэ һургуули улаан дипломтойгоор түгэсхэжэ, «Буряад үнэн» һониной сурбалжалагша болобо. «Булаг» кружогой ная гаран жэл соо һуралсалаа аалидуулангүй, бүри эршэдүүлжэ байхань лабтай.

You have no rights to post comments