Алхам гүйдэлынь
Агта моринһоо хурдан
Аймаг хошуундаа
Алдаршаһан,
Ара Халхада
Сууряатаһан.
Аянша эзэнээ
Баярлуулдаг
Ашата һайхан тэмээн
Болоо гэһэниинь энэл!
Хэдыхэн жэлэй
Үнгэрһэнэй дараа
Хэсүү ябадал
Болоһон гэнэ.
Хуйхуй4 гэдэгэй
Зэбсэгтэ сэрэг
Монголдо нэбтэржэ,
Хушууран добтолһоор
Орожо,
Талын монголшуудые
Тэбдэхээжэ,
Тааралдаһан бүхэниие
Дээрмэдэжэ,
Тэмсэлдэһэн бүхэниие
Алажа, сүйд хэдэг
Зайгуулшан, тонуулшан,
Луйбаршад5 олошорбо.
Бузар муухай,
Хорото дээрмэшэд
Олошорно гэдэгтэ
Буурал үбгэн
Балай анхаралаа
Табяагүй.
Бууратай тэмээн һүрэгѳѳ
Боролзойтын хүндыдэ
Табиһан байгаа гэнэ.
Хүсэжэ ябаһан
Хуйхуйнарта
Хээрын бэлшээридэ
Ябаһан
Тэмээн дайралдаба гэнэ.
«Хэрэгтэй тэмээ
Олобобди.
Хэтын холодо эдлэнэ» -
Гэжэ турлааг шэнгеэр
Хашхаралдажа,
Тон ехээр баярлаба.
Тунсаг һайхан
Уулган Шарые
Барижа ооһорлоод,
Тооһо татуулан,
Тэдэнэр ошобо гэнэ.
Һанаа амархан байһан
Буурал тэрэ үбгэн
Хэдыхэн хоногой
Дараагаар
Уулган Шарые
Хуйхуйнарай абаашаһые
Үзэн, мэдэн бодожо,
Һая мэдээ орожо,
Харахан гэртээ
Борохон хоногые
Хүлеэжэ,
Харамнан һанажа
Зобохонь тэрэ бэлэй…
Халха дүрбэн
Аймаг дамжуулһаар,
Хара уһа уулгангүй,
Хагда үбһэ хазуулангүй,
Хайрлаха, энэрхэ
Эзэгүй хатажа,
Ангажа, тулижа
Ябаһаар байтарнь,
Хабирга, нюрганиинь
Соорожо,
Хамар юуниинь
Һэтэрбэ гэнэ.
Томо мантан
Ханхар һайхан бэень
Хабтагар нарин
Болотороо
Эсэбэ сусаба гэнэ.
Бузар хомхой дайсад
Бусажа нютагтаа ошохоор
Булимтаржа хуряаһан
Эд хүрэнгэ зѳѳриеэ
Буу зэбсэг хүрэтэрнь
Бултыень нюрган дээрэнь
Обоолжо, бүхэлжэ,
Һайн татажа абаад,
Бурантаг юуень
Эрьюулжэ,
Сухалдан гуядажа гэнэ,
Саашаа гүйлгэбэ гэнэ.
Дэлгэрэнгыгээр 16-дахи дугаарта.
Хуйхуй 4 – дунгаан яһатан.
Луйбаршад 5 – мэхэшэд.
